Pas zgjedhjes së Shiroka-Pulës, Aliçkaj propozon ndryshime kushtetuese: Presidenti të zgjidhet direkt nga populli

Drejtori Ekzekutiv i Ligës Qytetare Shqiptaro-Amerikane, Agim Aliçkaj, e ka vlerësuar si një moment kthese për Kosovën zgjedhjen e Justina Shiroka-Pulës në postin e Presidentes, si dhe miratimin e Projektligjit për Gjykatën Speciale. Sipas tij, këto zhvillime shënojnë fundin e një krize të gjatë institucionale dhe hapin një kapitull të ri për stabilitetin politik të vendit. Në një prononcim për media, Aliçkaj theksoi se këto vendime kanë shmangur një kaos institucional që mund të kishte pasoja të rënda për shtetin. Ai vlerësoi se ndërgjegjësimi i krerëve politikë, i nxitur edhe nga zhvillimet rreth Dhomave të Specializuara në Hagë dhe ish-udhëheqësve të UÇK-së, ndihmoi në mbizotërimin e arsyes dhe interesit shtetëror mbi agjendat partiake. Një vlerësim të veçantë Aliçkaj ua kushtoi Kryeministrit Albin Kurti dhe kryetarit të PDK-së, Bedri Hamza, për gatishmërinë e treguar në arritjen e një kompromisi. Sipas tij, ky bashkëpunim është dëshmi se forcat politike dinë të veprojnë në përputhje me vullnetin e shprehur nga qytetarët në tri proceset e fundit zgjedhore. Tani, fokusi i qeverisë duhet të zhvendoset te zhvillimi ekonomik, sundimi i ligjit dhe përmirësimi i mirëqenies së qytetarëve. Duke analizuar profilin e presidentes së re, Aliçkaj shprehu besimin se përvoja e gjatë akademike dhe institucionale e Justina Shiroka-Pulës do t’i japë një dimension të ri bashkëpunues presidencës. Ai nënvizoi se prioriteti i saj duhet të jetë uniteti politik, forcimi i aleancës strategjike me Shtetet e Bashkuara të Amerikës, si dhe përshpejtimi i rrugës drejt integrimeve euroatlantike dhe NATO-s. Në përmbyllje, Aliçkaj bëri thirrje për një reformë të thellë kushtetuese, duke argumentuar se pozicioni i të parit të shtetit duhet të jetë mbi partitë politike. Ai sugjeroi që, për të garantuar një përfaqësim sa më gjithëpërfshirës dhe demokratik, Presidenti i Republikës së Kosovës në të ardhmen duhet të zgjidhet drejtpërdrejt nga vota e popullit.