Përplasje për biletat, “Ballistët” paralajmërojnë udhëtimin drejt Haraçinës pavarësisht ndalesës

Tifozët e njohur të Shkëndijës së Tetovës, “Ballistët”, kanë lëshuar një komunikatë të ashpër publike në prag të sfidës së Ligës së Parë të Maqedonisë së Veriut në futboll, e cila do të vërë përballë dy skuadrat me të njëjtin emër, Shkëndijën e Haraçinës dhe atë të Tetovës. Në njoftimin e tyre, grupi i tifozëve ka shprehur pakënaqësinë e thellë ndaj vendimit të klubit nga Haraçina për t'i refuzuar kërkesën për prani në stadium. Sipas “Ballistëve”, refuzimi ka ardhur me arsyetimin e “shkaqeve të sigurisë”, një vendim që ata e kanë cilësuar si të palogjikshëm dhe zhgënjyes. Tifozët tetovarë kanë kujtuar se në ndeshjet e tyre si vendas në qytetin e Tetovës kanë mirëpritur rregullisht tifozët kundërshtarë “Çlirimtarët”, si dhe grupe të tjera si “Shvercerat” nga Shkupi dhe “Ilirët” nga Kumanova, duke theksuar se mikpritja e ndërsjellë ka munguar nga ana e klubit vendas. Ata kanë theksuar gjithashtu se nuk shohin asnjë rrezik apo pasiguri për të udhëtuar në një mjedis me shumicë shqiptare, aq më tepër kur infrastruktura e stadiumit, e cila përbëhet nga dy tribuna të ndara, ofron kushtet ideale për një organizim të qetë dhe të sigurt. Në mbyllje të reagimit, “Ballistët” kanë qenë të prerë në vendimin e tyre, duke paralajmëruar se të dielën do të nisen drejt stadiumit dhe se përgjegjësia për çdo situatë do të mbetet mbi organizatorët nëse hyrja u mohohet.