Tensionet para Parlamentit, Policia shoqëron tetë protestues për dhunë ndaj efektivëve

Tetë persona janë shoqëruar në ambientet e komisariatit deri në orën 17:30, si pasojë e incidenteve dhe akteve të dhunshme të regjistruara gjatë protestës së zhvilluar këtë të sotme në afërsi të Kuvendit të Shqipërisë. Sipas njoftimit zyrtar të autoriteteve rendore, një pjesë e protestuesve kanë ushtruar dhunë fizike duke shtyrë dhe goditur efektivët e angazhuar për ruajtjen e rendit, ndërkohë që drejt tyre janë hedhur vezë, domate, gurë dhe sende të ndryshme. Gjatë zhvillimit të tubimit, uniformat blu theksojnë se u janë drejtuar vazhdimisht protestuesve përmes thirrjeve me megafon, duke u kërkuar ndalimin e menjëhershëm të sjelljeve të paligjshme, shmangien e bllokimit të rrugëve dhe respektimin e rreptë të perimetrit të sigurisë pranë institucionit ligjvënës. “Në zbatim të ligjit dhe në përmbushje të detyrës, Policia e Shtetit hartoi planin e masave për garantimin e perimetrit të sigurisë, si dhe të rendit e sigurisë gjatë tubimit të paralajmëruar nëpërmjet mediave dhe rrjeteve sociale, që u mbajt para Kuvendit të Shqipërisë ditën e sotme”, thuhet ndër të tjera në komunikatën zyrtare. Në vijim të reagimit, blutë bëjnë me dije se pavarësisht paralajmërimeve të përsëritura përmes mjeteve akustike, disa prej pjesëmarrësve kanë shpërfillur urdhrat ligjorë të punonjësve të policisë, duke vijuar me veprimet e tyre të dhunshme. Përballë kësaj situate dhe në përputhje të plotë me procedurat standarde të punës, forcat e rendit kanë ndërhyrë duke përdorur sprajin individual, çka ka sjellë neutralizimin e situatës dhe shoqërimin e tetë personave të identifikuar si kryesorë të dhunës deri në orën 17:30. Strukturat e Policisë së Shtetit po vijojnë angazhimin e tyre me profesionalizëm të lartë për të garantuar rendin publik dhe për të mbrojtur të drejtën kushtetuese të çdo qytetari për të protestuar në mënyrë paqësore. Në përfundim, Policia ka përsëritur thirrjen drejtuar qytetarëve pjesëmarrës që të respektojnë kornizën ligjore dhe të shmangin çdo akt agresiviteti ndaj efektivëve, duke paralajmëruar se çdo shkelje e ligjit do të ballafaqohet me masa të rrepta ndëshkimore.