Teherani lëshon ultimatum: Hapësira ajrore rajonale ose për të gjithë, ose për askënd

Irani ka paralajmëruar ndërmarrjen e masave për kufizimin e qarkullimit ajror në shkallë rajonale, si kundërpërgjigje ndaj ndalimit të operimit të kompanive të tij ajrore në aeroportet ndërkombëtare, veprim ky i kushtëzuar nga sanksionet e Uashingtonit. Këtë qëndrim e ka bërë të ditur Mohammad Mokhber, këshilltar i Udhëheqësit Suprem të Iranit, Mojtaba Khamenei, i cili ka theksuar se qielli i rajonit duhet të shërbejë në mënyrë të barabartë për të gjithë aktorët, pa përjashtime. “Fluturimet në rajon ose janë të hapura për të gjithë, ose nuk janë të hapura për askënd”, ka shkruar Mokhber në platformën X, duke reflektuar pakënaqësinë e autoriteteve iraniane. Ky reagim pasohet nga vendimet e fundit të autoriteteve në Irak dhe Emiratet e Bashkuara Arabe për të pezulluar shërbimet ndaj aviacionit iranian, si pasojë e frikës nga masat ndëshkimore të Shteteve të Bashkuara. Nga ana e tij, Teherani refuzon me forcë këtë qasje dhe ka sinjalizuar se pengesat e vendosura ndaj fluturimeve iraniane rrezikojnë të destabilizojnë të gjithë trafikun ajror rajonal. Masa shtrënguese amerikane prej vitesh kanëvënë në shënjestër sektorë kyçë të ekonomisë iraniane, përfshirë edhe atë të aviacionit, duke kufizuar ndjeshëm lidhjet e transportit ajror të Iranit me botën e jashtme.