Tensione te gjiganti madrilen: Kylian Mbappe sfidon hapur urdhrat e Jose Mourinho-s

Përpjekjet e Jose Mourinho-s për të vendosur rregull dhe disiplinë duket se ende nuk kanë dhënë rezultatet e dëshiruara. Atmosfera brenda dhomave të zhveshjes së klubit nga Madridi vazhdon të mbetet e tensionuar, ndërsa ftohja e krijuar nga konfliktet e sezonit të kaluar nuk është zbutur plotësisht, pavarësisht përpjekjeve të vazhdueshme të trajnerit portugez. Mediat spanjolle raportojnë se një nga sfidat më të mëdha për Mourinho-n në këtë periudhë po shfaqet Kylian Mbappe. Sulmuesi francez u largua nga grumbullimi i kombëtares pasi stafi mjekësor konstatoi një dëmtim në ligamentet e gjurit, por sjellja e tij në ditët në vijim ka rënë ndesh me rregullat e përcaktuara për fazën e rikuperimit. Mbappe është fotografuar gjatë orëve të vona të natës në një ambient argëtimi në Paris, në shoqërinë e partneres së tij, Ester Esposito. Më vonë, ai ka ndarë me ndjekësit një imazh ku shfaqet duke bërë biçikletë në Alpet franceze, një aktivitet që është rreptësisht i ndaluar nga stafi teknik për lojtarët nën urdhrat e Mourinho-s. Kujtojmë se vetë tekniku portugez është shprehur prerazi pak javë më parë rreth disiplinës që kërkon nga grupi i tij: – Secili prej jush duhet të jetë futbollist me kohë të plotë. Çdo veprim që bëjmë reflekton punën që bëjmë. Ushqimi, gjumi dhe jeta private tregojnë se sa profesionistë jemi. Askush prej nesh nuk mund të bëjë ski apo të pedalojë, pasi në rastin më të mirë, nëse dëmtohet, do të duhet të qëndrojë jashtë fushave për disa ndeshje. – Nuk mund të rrezikojmë që të rrëzohemi nga biçikleta dhe të pësojmë dëmtime që mund të na kushtëzojnë karrierën. E pranoj, të jesh një futbollist profesionist kërkon shumë sakrifica, – ka deklaruar Mourinho.