Nga bankat e universitetit te Njësitë Speciale: Profesori rrëfen metamorfozën e kapitenit Fatmir Balaj

Profesori Fatmir Shatri ka ndarë me publikun një rrëfim emocionues për kapitenin e Policisë së Kosovës, Fatmir Balaj, të cilin e ka njohur fillimisht si student në Fakultetin e Ndërtimtarisë, në vitin 1996. Shatri ka kujtuar se në atë periudhë Balaj ndiqte ligjëratat e tij private të matematikës. Tri dekada më vonë, ai është shndërruar në një zyrtar të lartë policor me përvojë dhe udhëheqës brenda Njësive Speciale të Policisë së Kosovës. “Ka njerëz që i takon në një moment të jetës dhe, pas shumë vitesh, emri i tyre rikthehet në kujtesë me një kuptim krejt tjetër. Kështu më ndodh me Fatmir Balajn”, ka shkruar Shatri në rrëfimin e tij. Më tej, ai ka evokuar rrugëtimin jetësor të Balajt, duke vënë inkursionin e tij nga vitet e studimeve, te kontributi si luftëtar i Ushtrisë Çlirimtare të Kosovës, e deri te shërbimi i tij i palodhur në radhët e Policisë së Kosovës që nga paslufta e vitit 1999. Shatri ka sjellë në vëmendje edhe angazhimet e ndërlikuara të Balajt gjatë protestave të tensionuara, operacioneve të ndryshme në veri të vendit, kohës së barrikadave, si dhe aksioneve të ndërmarra kundër rrjeteve të dyshuara për kontrabandë. “Një episod i dokumentuar nga Policia e Kosovës tregon edhe një dimension tjetër të tij. Në një rast ku një qytetar kërcënonte të hidhej nga kati i tetë i një ndërtese, Balaj mori pjesë në negociatat që përfunduan me shpëtimin e jetës së tij”, ka shtuar profesori. Në mbyllje të shkrimit të tij, Shatri ka theksuar lidhjen e hershme dhe respektin e ndërsjellë që ruan për ish-studentin e tij. “Por për mua mbetet diçka që koha nuk e ndryshon, pra para komandantit ishte studenti”, ka përfunduar Shatri.