“As foto e as fanellë me Messin”, trajneri i Beninit shpërthen ndaj Argjentinës pas ndeshjes miqësore

Gernot Rohr, përzgjedhësi i Përfaqësueses së Beninit, ka shprehur pakënaqësi të thellë ndaj mënyrës se afrimit dhe organizimit nga ana e Argjentinës, në kuadër të duelit miqësor që shënoi edhe paraqitjen e fundit lamtumirëse të yllit Lionel Messi me fanellën kombëtare. 73-vjeçari ka vënë në dukje se komunikimi me kundërshtarët ka qenë jashtëzakonisht sfidues, pavarësisht përpjekjeve të vazhdueshme të skuadrës së tij për të vendosur një kontakt të ngrohtë sportiv. “Ajo që na lë shije të hidhur është fakti se argjentinasit nuk treguan aspak mikpritje. Nuk na mundësuan asnjë fotografi me Messin dhe as shkëmbim fanellash. Stafi organizativ na ndaloi hyrjen si në tunelin e stadiumit, ashtu edhe në zonën e dhomave të zhveshjes”, u shpreh tekniku me origjinë nga Mannheim. Sipas tij, masat e rrepta të sigurisë bllokuan çdo mundësi komunikimi. “Trupat e sigurimit nuk lejuan njeri të afrohej. Disa prej futbollistëve tanë tentuan të bënin shkëmbim fanellash, duke e ditur se do të ishte e vështirë, por pavarësisht tentativave tona maksimale, mbetëm duarbosh”, shtoi ai. Tekniku gjerman tregoi gjithashtu se delegacioni i Beninit u mundua të zbutë situatën përmes një gjesti simbolik: “Ne u dorëzuam atyre një buqetë me lule në ngjyrat tona zyrtare – të verdhë, të kuqe dhe jeshile – mirëpo as kjo nuk solli ndonjë rezultat pozitiv”. Duke sjellë në vëmendje të kaluarën e tij, ku është ndeshur dy herë të tjera me argjentinasin gjatë periudhës kur drejtonte Nigerinë, Rohr tregoi se ka ruajtur një kujtim të veçantë nga ajo kohë. “Fanellën që Messi ma kishte dhuruar dikur, arrita ta siguroja me firmën e tij edhe tani, falë ndihmës së trajnerit Lionel Scaloni”, përfundoi Rohr.