Mbyllet hetimi dyvjeçar, Izedin Bytyqi shpallet i pafajshëm në rastin e njohur si “afera e ambalazhuesve të ujit”

Izedin Bytyqi ka bërë të ditur se Prokuroria Speciale ka marrë vendim për të mbyllur hetimet ndaj tij, pas një periudhe rreth dyvjeçare ku është hetuar nën dyshimet për veprën penale “Keqpërdorimi i pozitës apo autoritetit zyrtar”, rast ky i njohur gjerësisht në opinionin publik si “afera e ambalazhuesve të ujit”. Bytyqi ka sqaruar se zyrtarisht e ka pranuar aktvendimin për pushimin e hetimeve gjatë ditës së sotme. Sipas dëshmisë së tij, gjatë këtij harku kohor prej dy vitesh janë kryer hetime intensive dhe të gjithanshme, të cilat kanë përfshirë aplikimin e masave të fshehta hetimore, kontrolle të ndryshme, si dhe verifikim të hollësishëm të pasurisë, pronave, llogarive bankare dhe transaksioneve financiare. Ai ka theksuar se, pas analizimit të të gjitha provave dhe materialeve të siguruara, organi i akuzës ka vendosur ndërprerjen e hetimeve, me arsyetimin se nuk është konstatuar asnjë provë apo dëshmi që do të vërtetonte përfshirjen e tij në veprën penale për të cilën po hetohej. “Për mua ky vendim është një moment i rëndësishëm, sepse për dy vite kam qenë nën peshën e një dyshimi të rëndë penal, me gjithë pasojat personale, familjare, profesionale dhe reputacionale që një proces i tillë sjell”, tha Bytyqi.