Korridori VIII: Kryediplomati Konjufca kërkon kyçjen e plotë të Kosovës dhe ngre shqetësimin për energjinë

Ministri i Punëve të Jashtme dhe Diasporës, Glauk Konjufca, ka marrë pjesë në Konferencën Ndërkombëtare për Korridorin VIII, një ngjarje kjo e organizuar nga shteti i Bullgarisë. Gjatë punimeve të kësaj konference, kreu i diplomacisë kosovare e ka vendosur theksin te domosdoshmëria e ndërlidhjes rajonale, duke e vlerësuar atë jo thjesht si një prioritet ekonomik, por si një element kyç strategjik për sigurinë. Duke kërkuar integrimin e plotë të Kosovës në këtë rrjet të rëndësishëm, Konjufca ka vënë në dukje angazhimet financiare në Linjën Hekurudhore 10 dhe nismën strategjike për hekurudhën Prishtinë-Durrës. “Investimet tona në Linjën Hekurudhore 10 dhe hekurudhën e planifikuar Prishtina-Durrës do të forcojnë lidhjen rajonale, do të diversifikojnë rrugët e transportit dhe do të përforcojnë arkitekturën euroatlantike të sigurisë së Ballkanit Perëndimor”, ka shkruar Konjufca në platformën “X”. Në fjalimin e tij, ministri ka hapur gjithashtu çështjen e bllokadave të vazhdueshme që Serbia i bën qarkullimit të energjisë elektrike me Republikën e Kosovës, ndonëse afatet zyrtare ishin caktuar qartë nga Komuniteti i Energjisë. Sipas vlerësimit të tij, ky bllokim përbën një goditje për stabilitetin energjetik të rajonit dhe kërkon ndërhyrje urgjente e vendimtare nga ana e Bashkimit Evropian për t'i dhënë fund moszbatimit të marrëveshjeve. “Kjo minon sigurinë rajonale të energjisë dhe kërkon veprime të vendosura evropiane për të siguruar pajtueshmërinë me detyrimet ekzistuese”, ka vlerësuar ai. Në fund të fjalës së tij, ministri Konjufca ka bërë thirrje që Korridori VIII të mos mbetet vetëm një skicë në letër, por të marrë funksion të plotë në funksion të miqësisë dhe bashkëpunimit mes vendeve. “Korridori VIII duhet të bëhet më shumë sesa një vijë në hartë. Një Ballkan Perëndimor i qëndrueshëm dhe i ndërlidhur kërkon bashkëpunim të papenguar dhe përfshirje të plotë të Kosovës”, ka përfunduar ministri.