Lewis Hamilton i del në mbrojtje Fred Vasseur dhe kritikon ashpër mediat

Drejtuesi i Scuderia Ferrari, Fred Vasseur, ka shprehur hapur pakënaqësinë e tij ndaj shtypit, veçanërisht ndaj mediave italiane, një qasje kjo që është mbështetur fuqishëm edhe nga piloti Lewis Hamilton. Gjatë fundjavës së garës në Malajzi, kampioni shtatë herë i botës në Formula 1 u rreshtua plotësisht krah numrit një të skuadrës nga Maranello, duke iu referuar tensioneve të krijuara nga raportimet gazetareske. Piloti britanik theksoi se spekulimet e vazhdueshme të mediave kanë një ndikim negativ dhe destabilizues mbi atmosferën e brendshme të ekipit. Sipas tij, pavarësisht se ai vetë i shmang lajmet e tilla, prania e titujve sensacionalë ndikon pashmangshëm te pjesëtarët e tjerë të skuadrës, të cilët ndodhen nën presion të vazhdueshëm. "Çdo fundjavë, ata përpiqen të vijnë në pistë dhe të bëjnë punën më të mirë të mundshme edhe pse jo gjithmonë ia dalin mbanë. Kur familja të dërgon mesazhe për atë që po lexojnë në gazeta nuk ka asgjë që mund të bësh. Njerëzit në fabrikë i lexojnë të gjitha ato gjëra dhe kjo krijon përshtypjen se nuk po bëjnë asgjë siç duhet, edhe pse po japin maksimumin“, u shpreh Hamilton gjatë prononcimit të tij. Duke iu drejtuar stafit dhe publikut, britaniku dha një këshillë të qartë për të mbrojtur ambientin e punës nga dezinformimi: “Mesazhi që dua të përcjell është të mos lexoni asgjë nga ato që shkruhen sepse asnjë nga njerëzit që i shkruajnë ato artikuj nuk e ka idenë më të vogël se për çfarë po flet, meqenëse nuk janë pjesë e ekipit. Ata nuk e dinë se çfarë ndodh pas dyerve të mbyllura. Nuk e dinë se sa shumë po punojnë të gjithë”. Hamilton shtoi se shkrimet e tilla ushqehen vetëm nga supozime dhe opinione personale, të cilat vetëm sa shtojnë irritimin brenda kampit të kuq. Ai konfirmoi se fokusi i skuadrës mbetet i pandryshuar te puna dhe performanca në pistë, pavarësisht zhurmës mediatike, me synimin për të arritur objektivat afatgjata. "E dija se në vitin e dytë nuk do të ishim aty ku donim, por shpresoj që, me punën e palodhur të të gjithëve, ndoshta vitin e ardhshëm mund të arrijmë aty ku duam,” përfundoi fjalën e tij kampioni britanik.