Arsenal nuk ndalet, pas Rice në plan janë rinovimet e Odegaard dhe Timber

Klubi londinez i Arsenalit po punon intensivisht për të garantuar të ardhmen e shtyllave kryesore të skuadrës, teksa drejtuesit shfaqen mjaft optimistë se gjatë javëve në vijim do të mbyllin me sukses disa marrëveshje kyçe për vazhdimësinë. Pas rinovimit katërvjeçar të kontratës me trajnerin Mikel Arteta, fokusi i drejtuesve të klubit anglez ka kaluar te mesfushori Declan Rice, me të cilin tashmë kanë nisur bisedimet zyrtare për një marrëveshje të re. Që nga transferimi i tij nga West Ham United në korrik të vitit 2023 për shifrën e 105 milionë paundëve, Rice është kthyer në një nga pikat më të forta të formacionit të drejtuar nga tekniku spanjoll. Përfaqësuesi anglez ka regjistruar tashmë mbi 150 ndeshje si titullar me fanellën e “Topçinjve”. Edhe pse kontrata e tanishme skadon në qershor të vitit 2028, Arsenali synon t'ia zgjasë atë edhe për dy sezone të tjera. Ky akord i ri pritet të shoqërohet me një përmirësim të ndjeshëm të kushteve financiare, duke e çuar pagën e tij aktuale prej afërsisht 240 mijë paundësh në javë drejt shifrave të Bukayo Sakës, i cili thuhet se përfiton rreth 350 mijë paund në javë. Pasi të finalizohet çështja e Rice, vëmendja e strukturave drejtuese të klubit do të zhvendoset te kapiteni Martin Odegaard dhe mbrojtësi i talentuar Jurrien Timber. Edhe pse të dy futbollistët janë të lidhur me klubin deri në përfundim të edicionit 2027/28, drejtuesit duan të blindojnë shërbimet e tyre për një afat edhe më të gjatë kohor. Performancat fantastike të Odegaard në këtë nisje sezoni, si dhe roli i pazëvendësueshëm i Timber në skemat e Artetës, kanë bindur shtabin drejtues se dy lojtarët meritojnë marrëveshje të reja. Në këtë mënyrë, Arsenali synon të ruajë bërthamën e grupit dhe të ndërtojë një stabilitet afatgjatë në “Emirates Stadium”, në rrugëtimin e tyre për të dominuar futbollin anglez.