Sanksionet ndaj Manchester City-t, reagon agjenti i Donnarummës: E ardhmja e Gigit është e sigurt

Gianluigi Donnarumma nuk ka asnjë arsye për t'u shqetësuar rreth të ardhmes së tij në radhët e Manchester City-t, pavarësisht sfidave dhe zhvillimeve të fundit me karakter financiar që kanë përfshirë klubin anglez. Këtë qëndrim e ka bërë të qartë Enzo Raiola, agjenti i portierit italian, i cili ka theksuar se krerët e skuadrës kanë pasur tashmë komunikim direkt me lojtarin, duke i ofruar garancitë e nevojshme për situatën e krijuar. Kujtojmë se një panel i pavarur e ka konsideruar Manchester City-n përgjegjës për shkeljen e 114 rregullave financiare, ndërkohë që klubi nga Premierliga ka mohuar kategorikisht çdo akuzë dhe ka ushtruar të drejtën e ankimimit të vendimit. Donnarumma, i cili u transferua në kampin e kampionëve anglezë gjatë merkatos së verës së kaluar, bën pjesë në grupin e lojtarëve që mund të ndikoheshin në rast të një përshkallëzimi të situatës. Megjithatë, përfaqësuesi i tij nuk shikon asnjë motiv për alarm apo panik. I pyetur nga mediat nëse kjo situatë institucionale mund të sillte ndryshime për gardianin italian, Raiola është përgjigjur pa hezitim gjatë një prononcimi për Radio Napoli Centrale. “A do të ndryshojë ndonjë gjë nga kaosi i Manchester City-t? Jo, asgjë nuk do të ndryshojë për ne ose për Gigin. Lajmet dalin periodikisht. Klubi ka folur me Gigin dhe të gjithë janë të qetë”, ka deklaruar agjenti. Më tej, Raiola ka shtuar se Donnarumma ka pranuar siguri të drejtpërdrejta nga drejtuesit e Manchester City-t, ndërsa tashmë vëmendja e plotë e tij është e përqendruar te fusha e blertë dhe angazhimet sportive. “Ka ndeshje të rëndësishme kundër Liverpoolit dhe PSG-së, pastaj drejtësia sportive do të ndjekë rrugën e saj. Por Gigio ka marrë siguri nga Manchester City”, u shpreh ai. Nga ana e tij, Manchester City vazhdon të kundërshtojë me forcë vendimin e panelit të pavarur, duke këmbëngulur se nuk ka shkelur asnjë rregullore financiare dhe se do ta ndjekë betejën ligjore deri në fund për të mbrojtur interesat e veta. Ndërkohë që priten zhvillime të reja në aspektin juridik, skuadra e drejtuar nga Pep Guardiola po përgatitet për sfidat e radhës që do të vënë në provë grupin. Testi i parë i rëndësishëm e pret skuadrën në udhëtimin drejt 'Anfield'-it për t'u ndeshur me Liverpoolin, një derbi që premton emocione të forta dhe tension edhe për shkak të situatës rreth klubit. Pas këtij takimi, City do të matë forcat edhe me Paris Saint-Germain, në një tjetër përballje kyçe të sezonit. Portieri italian, i cili iu bashkua klubit verën e shkuar, nuk ka ndër mend t'i ndryshojë planet e tij karrieristike për shkak të këtyre hetimeve. Komunikimi i drejtpërdrejtë me klubin i ka dhënë atij qetësinë e duhur. Pavarësisht pasigurisë që mbretëron në zyrat e klubit për shkak të procesit të apelimit, Donnarumma mbetet i përkushtuar ndaj detyrave të tij profesionale te Manchester City, pa pasur asnjë sinjal largimi nga 'Etihad'.