Strategjia e madhe e Arsenalit: Pas trajnerit Arteta, radha e yjeve për kontrata të reja

Klubi londinez i Arsenalit ka nisur një fushatë intensive për të garantuar të ardhmen e shtyllave kryesore të skuadrës, teksa drejtuesit shfaqen mjaft optimistë se në periudhën në vijim do të mbyllin me sukses disa procese kyçe të rinovimeve. Pas hedhjes së hapit të parë, që konsistoi në vazhdimin e bashkëpunimit me trajnerin Mikel Arteta për katër sezone të tjera, fokusi i drejtuesve ka kaluar te mesfushori Declan Rice, me të cilin tashmë kanë nisur bisedimet zyrtare për një marrëveshje të re. Që prej transferimit të tij nga radhët e West Ham United në korrik të vitit 2023 për shifrën rekord prej 105 milionë paundësh, Rice është shndërruar në një element të pazëvendësueshëm për “Topçinjtë”, duke numëruar tashmë mbi 150 paraqitje si titullar. Pavarësisht se kontrata aktuale e 27-vjeçarit skadon në qershor të vitit 2028, drejtuesit e klubit synojnë t'ia zgjasin atë edhe për dy vite të tjera, paketë kjo që pritet të shoqërohet me një përmirësim të ndjeshëm të pagës së tij, e cila aktualisht llogaritet rreth 240 mijë paund në javë. Në rast se ky rinovim konkretizohet, atëherë fitimet e anglezit do t'i afrohen ndjeshëm standardit financiar të Bukayo Sakës, i cili thuhet se arkëton afërsisht 350 mijë paund në javë. Odegaard dhe Timber, në fokusin e drejtuesve për marrëveshje afatgjata Pas çështjes së Rice, agjenda e drejtuesve të Arsenalit parashikon hapjen e bisedimeve edhe për kapitenin Martin Odegaard dhe mbrojtësin e talentuar Jurrien Timber. Megjithëse të dy lojtarët janë të lidhur me kontrata që zgjasin deri në përfundim të sezonit 2027/28, drejtoria sportive kërkon të blindojë shërbimet e tyre për një afat edhe më të gjatë kohor. Paraqitjet mbresëlënëse të Odegaard në këtë nisje sezoni, si dhe pesha e madhe që Timber mban në skemat taktike të trajnerit Arteta, kanë bindur përfundimisht shtabin drejtues se këta futbollistë meritojnë kushte të përmirësuara kontratuale. Në këtë mënyrë, Arsenali po synon të ruajë të paprekur boshtin e skuadrës dhe të ndërtojë një stabilitet të qëndrueshëm në “Emirates Stadium”, në kuadër të ambicieve madhore për të dominuar skenën e futbollit anglez.