Raporti i KiE-së zbulon sfidat e pushtetit lokal: Apel për bashkëpunim dhe reforma urgjente mes qeverisë dhe komunave

Mungesa e koordinimit, e bashkëpunimit mes pushtetit qendror dhe atij lokal, si dhe mungesa e llogaridhënies janë disa nga gjetjet kryesore të raportit gjithëpërfshirës për zbatimin e parimeve të Kartës Evropiane të Vetëqeverisjes Vendore, i cili u publikua gjatë ditës së sotme. Francesco Palermo, anëtar i grupit të ekspertëve të pavarur për këtë kartë, ka paraqitur sfidat kryesore me të cilat ballafaqohet qeverisja lokale në Kosovë, duke vënë inxhinierinë ligjore dhe praktikën nën lupë. “Procesi i konsultimeve mbetet i brabët si në aspektin legjislativ ashtu edhe në atë praktik. Kjo krijon boshllëqe që shpien drejt përgjegjësive të mjegulluara, ndërkohë që llogaridhënia nuk është mjaft e qartë, duke rrezikuar kalimin e fajit nga njëri nivel tek tjetri. Kemi mbivendosje të dispozitave ligjore në fushën e vetëqeverisjes lokale. Nevojitet një koordinim shumë më i mirë në sektorë specifikë, si menaxhimi, çështjet pronësore, kadastra, shërbimi i zjarrfikësve, menaxhimi i mbeturinave dhe rekrutimi i stafit, ku komunat nuk gëzojnë autonomi të mjaftueshme. Tri çështje kyçe që kërkojnë vëmendje mbeten të drejtat e komuniteteve, procesi i konsultimeve dhe mbrojtja gjyqësore e pushtetit lokal”, deklaroi Palermo. Në cilësinë e nikoqires së kësaj konference, drejtoresha e Kongresit të Autoriteteve Vendore dhe Rajonale të Këshillit të Evropës, Claudia Luciani, theksoi se ky dokument ka për qëllim të shërbejë si një pikënisje objektive për reformat që autoritetet kosovare duhet t'i ndërmarrin. Ajo shtoi se qëllimi i raportit është konstruktiv, për të mbështetur punën e deritanishme dhe për të ofruar bazë të shëndoshë për zhvillim demokratik, duke u bërë thirrje institucioneve ta shohin atë si një gurthemel për dialog të mëtejmë e jo si një gjykim shkollor. Në ngjarje mori pjesë edhe ministri i Administrimit të Pushtetit Lokal, Elbert Krasniqi, i cili ritheksoi se ekzekutivi e konsideron vetëqeverisjen lokale si njërën ndër shtyllat më të rëndësishme për funksionimin e demokracisë në shtet. Krasniqi përmendi strategjinë e re qeveritare që synon ngritjen e cilësisë së shërbimeve publike në nivel lokal dhe forcimin e besimit qytetar ndaj institucioneve. “Për Qeverinë e Kosovës vetëqeverisja lokale është një nga shtyllat kryesore të funksionimit demokratik të shtetit. Komuna është niveli që ka ndikim të drejtpërdrejtë në jetën e qytetarëve, duke shndërruar politikat publike në zhvillim dhe mirëqenie. Strategjia e re përfshin gjithashtu asamblenë e qytetarëve në komuna si mekanizëm për të rritur dialogun mes qytetarëve dhe pushtetit lokal. Një vetëqeverisje funksionale kërkon transparencë, llogaridhënie, administratë profesionale dhe menaxhim të bazuar në performancë. Marrëdhënia ndërmjet nivelit qendror dhe atij lokal duhet të mbështetet në role të qarta dhe bashkëpunim të vazhdueshëm”, u shpreh ministri Krasniqi. Në anën tjetër, kryetari i Asociacionit të Komunave të Kosovës, Agim Aliu, ka ngritur shqetësime dhe kritika të ashpra drejtuar qeverisë, duke vlerësuar se pozita reale e komunave në disa fusha të rëndësishme është përkeqësuar krahasuar me periudhat e kaluara.