Lidhjet me Trump në fokus: Si u paguan mbi 4 milionë dollarë lobistë amerikanë nga Republika Srpska

Sipas një hetimi të publikuar nga gazeta prestigjioze “The New York Times”, dy personalitete me ndikim dhe afërsi me presidentin amerikan Donald Trump kanë vizituar Republikën Srpska. Qëllimi i kësaj vizite ka qenë ofrimi i këshillave për kabinetin qeverisës pro-rus të këtij entiteti brenda Bosnjës dhe Hercegovinës. Në raportimin e saj, e përditshmja amerikane bën të ditur se shuma e derdhur për këto shërbime ka kaluar shifrën e 4 milionë dollarëve. Dokumentet zyrtare dëshmojnë se pagesat janë kryer ndaj aktorëve politikë dhe lobistëve që gëzojnë lidhje të ngushta me kreun e Shtëpisë së Bardhë dhe strukturat e Partisë Republikane. “Lobistëve dhe operativëve me lidhje me zotin Trump dhe aleatët e tij republikanë u janë paguar më shumë se 4 milionë dollarë nga qeveria e Republikës Srpska që nga fillimi i vitit të kaluar, sipas të dhënave të depozituara në Departamentin e Drejtësisë,” theksohet në shkrimin e “The New York Times”, ndërkohë që vetë administrata amerikane është distancuar nga këto zhvillime.