Skandali financiar nuk e lëkund Manchester Cityn: Agjenti i Donnarummas zbulon qetësinë në klub dhe besimin te drejtësia

Manchester City vazhdon të qëndrojë në epiqendër të vëmendjes mediatike pas vendimit bujshëm që e shpalli fajtor klubin për shkelje të rënda financiare, ndonëse brenda radhëve të “Qytetarëve” mbretëron besimi dhe qetësia. Enzo Raiola, agjenti i portierit italian Gianluigi Donnarumma, ka konfirmuar se “gardiani” i portës ka marrë garanci të plota nga krerët e institucionit, duke theksuar se ky zhvillim nuk e cenon aspak të ardhmen e tij në klub. Kujtojmë se klubi anglez ka ushtruar tashmë të drejtën e ankimit kundër vendimit të komisionit të pavarur, i cili e konsideroi skuadrën përgjegjëse për manipulimin e të ardhurave komerciale në një vlerë prej afro 830 milionë funtesh, përmes marrëveshjeve të cilësuar si fiktive me kompani me seli në Abu Dhabi. Duke folur për “Radio Napoli Centrale”, Raiola u shpreh se situata aktuale nuk përbën shqetësim: “A mund ta ndryshojë diçka kaosi te Manchester City? Jo, nuk do të ndryshojë asgjë për ne apo për Gigion. Lajmet dalin periodikisht. Klubi ka folur me Gigion dhe të gjithë janë të qetë. Tani janë ndeshjet e rëndësishme ndaj Liverpoolit dhe PSG-së, ndërsa më pas drejtësia sportive do ta ndjekë rrugën e saj. Por Gigio ka marrë garanci nga Manchester City”. Nëse apelimi i klubit nuk kurorëzohet me sukses, pasojat mund të jenë shkatërruese, duke përfshirë largimin përfundimtar nga Premierliga, heqjen e pikëve në edicionet e ardhshme, privimin nga titujt e fituar në të kaluarën, si dhe një bllokim total të merkatos së transferimeve. Një skenar i tillë do të prodhonte një hije të rëndë pasigurie jo vetëm për Donnarumman, por edhe për pjesën tjetër të grupit të lojtarëve të skuadrës. Ndërkohë, sfida e radhës e kampionëve në fuqi do të zhvillohet në “Anfield” ndaj Liverpoolit, duke shënuar daljen e parë në fushë pas shpalljes së vendimit. Për këtë përballje, Policia e Merseyside ka hartuar një protokoll të rreptë sigurie, pasi mbështetësit vendas paralajmërojnë pritje me protesta të ashpra ndaj autobusit të mysafirëve. Në anën tjetër, të mërkurën e ardhshme, “Etihad Stadium” do të presë takimin e parë shtëpiak që nga momenti i tronditjes financiare. Në tribunë pritet të jetë i pranishëm edhe trajneri Pep Guardiola, i cili që prej ditës së parë ka dalë hapur në mbrojtje të klubit përballë këtij verdikti.