Skandali i narko-shtetit: Detaje të reja lidhin ish-gjeneralin rumun Florian Coldea me Vlora Hysenin

Ish-këshilltari i jashtëm i kryeministrit Edi Rama dhe ish-gjenerali i shërbimit sekret rumun, Florian Coldea, është rikthyer fuqishëm në qendër të vëmendjes së opinionit publik pas zhvillimeve të fundit lidhur me arrestimin e Vlora Hysenit. Autoritetet rumune akuzojnë Coldean për bashkëpunim me kartelin Sinaloa në trafikimin e kokainës nga Shqipëria drejt tregut evropian, ndërkohë që raportimet e fundit nga Rumania sugjerojnë se figurë e njohur si “Gjenerali i Zi” ka luajtur rol në trajnimin e Hysenit. Sipas informacioneve nga shtypi shqiptar, Florian Coldea ndodhet aktualisht në Tiranë. Kjo vizitë pason vendimin për pezullimin nga detyra të drejtueses së shërbimeve të inteligjencës së Shqipërisë, ndaj së cilës është lëshuar tashmë një urdhër-arresti. Burimet lokale bëjnë me dije se të dy zyrtarët kishin krijuar lidhje të ngushta gjatë periudhës kur Coldea mbante pozicionin e këshilltarit të kreut të qeverisë shqiptare, Edi Rama. Disa burime investigative aludojnë se Hyseni mund të ketë marrë një trajnim operacional pikërisht nga “Gjenerali i Zi”. Televizioni rumun Realitatea PLUS i është drejtuar Florian Coldeas për një reagim zyrtar, por deri më tani ai nuk ka dhënë asnjë përgjigje. Vlora Hyseni aktualisht po përballet me akuza të rënda për nxjerrje të sekretit shtetëror dhe favorizim të personave të përfshirë në rrjete të krimit të organizuar, çështje e cila po hetohet nga Prokuroria e Posaçme Kundër Korrupsionit dhe Krimit të Organizuar (SPAK). Sipas artikujve të referuar në shtypin vendas, rrugët e Hysenit dhe Coldeas janë kryqëzuar në të kaluarën, në kohën kur emërimet e tyre përkatëse kishin shkaktuar bujë dhe debate publike. Madje, raportimet tregojnë se ata kanë ndarë të njëjtën zyrë për një periudhë kohe. Gazetarët vënë në dukje se pas ngritjes në krye të SRI-së, Coldea shtriu ndikimin e tij edhe brenda strukturave të inteligjencës shqiptare, ndërsa raportohet gjithashtu për udhëtime dhe takime të përbashkëta jashtë vendit, edhe pasi Hyseni kishte marrë drejtimin e institucionit sekret. Në rrafshin juridik, Florian Coldea poballëhet me drejtësinë në një dosje penale ku akuzohet për trafikim influence, krijim të grupit të strukturuar kriminal dhe pastrim parash. Në këtë proces gjyqësor, ai akuzohet së bashku me Dan Tocaci dhe avokatin Doru Trăilă. Seanca e radhës për shqyrtimin e ankimit në Gjykatën e Lartë është caktuar të mbahet më 15 tetor 2026.