Rrëfimi i Asencion: Vizita e Mourinhos që më ngriti moralul dhe pendimi i thellë për gabimin e rëndë te Real Madridi

Raúl Asencio po kalon një fazë mjaft sfiduese në karrierën e tij sportive, megjithatë mbrojtësi i Real Madridit ka vendosur të flasë haptazi për të gjitha sfidat me të cilat është përballur përgjatë muajve të fundit. Futbollisti 23-vjeçar së fundmi iu nënshtrua një ndërhyrjeje kirurgjikale në tibie, ndërsa në një rrëfim për gazetën “AS”, ai ka ndarë detaje nga vizita e papritur që mori nga trajneri José Mourinho menjëherë pas operacionit. Asencio pranon se ky gjest nga ana e strategut portugez i dha një shtysë të jashtëzakonshme psikologjike në një kohë kur ai po përballej me shumë dilema dhe pasiguri lidhur me procesin e rikuperimit. “Ajo vizitë më dha shumë energji. Në ato momente dyshimesh, kur mendon se si do të shkojë rikuperimi dhe sa gjatë do të jem jashtë fushave, fakti që Mou erdhi të më vizitonte dhe më tregoi atë afërsi që e kemi parë të gjithë në dhomën e zhveshjes që nga fillimi i sezonit, më ndihmoi shumë”, ka theksuar Asencio. Gjatë bisedës, ai ka hedhur dritë edhe mbi anën njerëzore të Mourinhos, e cila shpesh mbetet jashtë vëmendjes së mediave, duke nënvizuar se perceptimi i publikut për teknikun ndryshon rrënjësisht nga realiteti brenda mjediseve të brendshme të klubit. “Është një person më shumë në dhomën e zhveshjes. Kur isha i vogël, e shihja Mourinhon me atë karakterin e tij të fortë. Por brenda është një person i mrekullueshëm, gazmor, që dëshiron të kalojë shumë kohë me ne. Është një prej nesh”, u shpreh ai. Megjithatë, një pjesë e rëndësishme e intervistës i kushtua një prej episodeve më të errëta në jetën e tij personale, konkretisht ngjarjes së verës së kaluar kur u ndalua nga autoritetet duke drejtuar automjetin nën efektin e alkoolit. Duke treguar maturi, lojtari rikonfirmoi edhe një herë pendesën e tij të thellë, duke marrë përsipër të gjithë faturën morale të atij veprimi. “Ishte një moment shumë i vështirë. U bashkuan disa situata në jetën time dhe ndodhën brenda një periudhe të shkurtër. Mou kishte të drejtë. Unë gabova. E pranova dhe e pranoj, kam kërkuar falje dhe do të vazhdoj ta bëj”, tha mbrojtësi. Në këtë kontekst, 23-vjeçari shtoi se tashmë e ka kuptuar plotësisht peshën dhe përgjegjësinë e madhe që mbart veshja e fanellës së skuadrës madrilene. “Jam 23 vjeç dhe kam bërë gabime, siç mund t’i bëjë secili në këtë moshë. Por duhet të jem i vetëdijshëm se ku jam. Jam te Real Madridi dhe kjo nuk mund të ndodhë më. Dua ta përmbys këtë situatë dhe të fitoj tituj me këtë klub dhe këtë fanellë, shpresoj për pjesën tjetër të karrierës sime”, deklaroi ai. Duke iu referuar ecurisë aktuale dhe momentit delikat që po kalon Real Madridi, Asencio u bëri thirrje mbështetësve të mos e humbasin besimin te skuadra. “Ky është vetëm fillimi. Sezoni është shumë i gjatë. Do të ndodhin shumë gjëra dhe gjithçka mund të ndryshojë. Ne e kuptojmë kërkesën e tifozëve dhe e ndajmë atë. Duhet të punojmë më shumë dhe të flasim më pak, për ta treguar në fushë”, u shpreh futbollisti. Për momentin, prioriteti i tij absolut mbetet rikuperimi i plotë dhe kthimi sa më i shpejtë në shërbim të ekipit. “Është e dhimbshme që nuk mund ta ndihmoj ekipin tani. E kuptoj që madridistët në një moment mund të jenë zhgënjyer me mua, por do të bëj gjithçka për ta përmbysur këtë. Jam i pari që jam i lënduar nga gjithçka që ka ndodhur. Një lojtar i akademisë gjithmonë do të japë gjithçka për këtë fanellë. Unë e kam dëshmuar dhe kur të rikthehem do ta dëshmoj përsëri”, përfundoi Asencio, duke përcjellë njëkohësisht një perspektivë optimiste për të ardhmen e klubit nën drejtimin e Mourinhos.