Bllokimi i dhjetëra minatorëve në Trepçë, ndërmarrja zbardh detajet e avarisë: Mungonin pjesët rezervë

Ndërmarrja “Trepça” ka dalë me një njoftim zyrtar për të sqaruar incidentin e ndodhur mbrëmjen e kaluar në Minierën me Flotacion në Stan Tërg, ku gjithsej 63 punonjës mbetën të bllokuar nën tokë si pasojë e një defekti teknik në sistemin elektrik. Sipas sqarimit nga menaxhmenti, prishja ka ndodhur rreth orës 19:30 në Trafon Tuneli, konkretisht në sistemin prej 35 kV. Kjo situatë çoi në ndërprerjen e menjëhershme të energjisë elektrike për të gjithë kompleksin e minierës dhe Njësinë e Flotacionit. Në kohën kur ndodhi avaria, nëntokë po zhvillonin aktivitetin e tyre 63 minatorë të angazhuar në ndërrimin e dytë, të cilët ishin në pritje të përfundimit të orarit zyrtar të punës në orën 23:00. Nga ana e ndërmarrjes bëhet e ditur se 54 prej punëtorëve arritën të ngjiten në sipërfaqe nëpërmjet shkallëve emergjente, ndërsa nëntë të tjerë preferuan të qëndronin brenda minierës derisa të rikthehej furnizimi i rregullt me rrymë. Normalizimi i furnizimit me energji u arrit në orën 02:30 pas mesnatës, ndërsa nëntë minatorët e mbetur dolën shëndosh e mirë në sipërfaqe pak minuta më vonë, saktësisht në orën 02:50. Pas stabilizimit të situatës dhe rikthimit të energjisë, ndërrimi i parë i punonjësve ka nisur angazhimin e rregullt në minierë pa u penguar. Megjithatë, Njësia e Flotacionit vazhdon të mbetet jashtë funksionit për shkak të dëmtimeve të konsiderueshme që shkaktoi defekti në trafon 35 kV. “Procesi i sanimit është vështirësuar nga mungesa e pjesëve rezervë në magazinë, pasi këto pjesë nuk disponohen aktualisht në stok. Pas përfundimit të riparimeve dhe kryerjes së të gjitha verifikimeve teknike dhe të sigurisë, do të bëhet rikthimi i plotë i furnizimit me energji elektrike dhe vënia në funksion e Njësisë së Flotacionit. Ne mbesim të angazhuar me të gjitha mundësistë tona dhe pa kursyer asgjë nga ajo që dimë e mundemi, për ta kthyer situatën në normalitet. Për zhvillimet e mëtejshme dhe përfundimin e sanimit të avarisë do të njoftoheni me kohë”, thuhet në deklaratën e ndërmarrjes.