Bllokimi i pagave në NPB, Përparim Rama i bën thirrje Gjykatës Supreme për shqyrtim urgjent

Kryetari i Prishtinës, Përparim Rama, i është drejtuar Gjykatës Supreme me një kërkesë publike për shqyrtimin me prioritet të lëndës që ka të bëjë me Ndërmarrjen Publike Banesore (NPB), duke theksuar se nga kjo situatë janë prekur drejtpërdrejt afro 350 familje. Përmes një adresimi në rrjetet sociale, pas një vizite që i bëri zyrave të kësaj ndërmarrjeje dhe takimit me drejtuesit e saj, i pari i Kryeqytetit shprehu shqetësimin e thellë për mospagimin e punonjësve. Sipas kreut të Prishtinës, kriza aktuale është rrjedhojë e një vendimi të marrë para se ai të merrte drejtimin e komunës, veprim të cilin e cilëson si të paligjshëm dhe shkaktar kryesor të rrezikimit të veprimtarisë së ndërmarrjes. “Këtë çështje e kam adresuar në gjykatë që nga fillimi i qeverisjes sonë, sepse kam parë se vendimi dhe procesi janë të paligjshëm dhe e rrezikojnë ndërmarrjen, siç edhe ndodhi”, u shpreh Rama. Ai shtoi se gjatë gjithë kësaj periudhe ka kërkuar nga organet e drejtësisë mbrojtjen e pasurisë publike, ndërsa tani ka përsëritur thirrjen për një vendimmarrje të shpejtë nga instanca më e lartë gjyqësore. “Prandaj, kërkoj nga Gjykata Supreme që ta shqyrtojë këtë çështje me prioritet, sepse 350 familje kanë mbetur pa paga dhe po dëmtohen nga një proces i nisur në qeverisjen e kaluar në Kryeqytet”, ka shkruar ai. Në fund, Rama ka përsëritur se administrata e tij nuk mban përgjegjësi për këtë ngërç, por se ka ndërmarrë hapat e nevojshëm për ta ndalur atë. “Ne nuk e kemi krijuar këtë problem. Kemi vepruar për ta ndalur. Tani kërkojmë vendim, mbrojtje të ndërmarrjes dhe llogaridhënie”, përfundoi Rama.