Trump hedh poshtë ofertën e Iranit për armëpushim: Sulmet mund të rifillojnë pas zgjedhjeve të nëntorit

Kreu i Shtëpisë së Bardhë, Donald Trump, ka refuzuar ofertën e paraqitur nga Teherani zyrtar për vendosjen e një armëpushimi 7-ditor. Burime pranë administratës amerikane bëjnë me dije se presidenti është shprehur se bombardimet ndaj objektivave iraniane mund të rifillojnë menjëherë pas përfundimit të zgjedhjeve të mesmandatit në muajin nëntor. Iniciativa e iraniane parashikonte ndalimin e menjëhershëm të armiqësive për një periudhë shtatëditore dhe zhbllokimin e qarkullimit në Ngushticën e Hormuzit, e cila luan një rol kyç për tregtinë ndërkombëtare të naftës dhe gazit natyror. Si kundërpërgjigje, autoritetet në Teheran kërkonin nga Shtetet e Bashkuara heqjen e bllokadës detare në brigjet e tyre, lehtësimin e masave kufizuese për eksportet e naftës, si dhe zhbllokimin e fondeve iraniane të ngrira në bankat e huaja. Skema e propozuar nga pala iraniane përfshinte gjithashtu nisjen e dialogut dypalësh mes Uashingtonit dhe Teheranit për çështjen e diskutueshme të programit bërthamor, menjëherë pas skadimit të afatit të armëpushimit. Gjatë punimeve në Kombet e Bashkuara, ministri i Jashtëm i Iranit, Abbas Araghchi, theksoi se kjo marrëveshje ishte e gatshme për t'u zbatuar në çdo moment, mjaftonte që pala amerikane të jepte dritën jeshile. Edhe presidenti iranian, Masoud Pezeshkian, konfirmoi se shteti i tij ishte plotësisht i përgatitur për ta vënë në jetë këtë plan, nëse Uashingtoni do të pranonte kushtet e parashtruara. Megjithatë, udhëheqësi amerikan mbetet skeptik se Irani do të përmbushë kërkesat e SHBA-së lidhur me ambiciet e tij bërthamore. Për më tepër, zyrtarët e lartë amerikanë kanë konfirmuar se nuk ekziston asnjë plan për heqjen e bllokadës detare ndaj porteve të Iranit. Në kuadër të zhvillimeve diplomatike gjatë Asamblesë së Përgjithshme të OKB-së, palët kanë mbajtur kontakte. Sekretari amerikan i Shtetit, Marco Rubio, deklaroi se takimi i zhvilluar mes delegacioneve me ndërmjetësimin e Katarit nuk ka prodhuar ndonjë rezultat apo përparim të prekshëm.