Përfundon me sukses drama e 63 minatorëve në Stantërg, drejtori i Trepçës jep detajet për gjendjen e tyre

Kanë dalë në sipërfaqe shëndetë e mirë të gjithë minatorët që kishin mbetur të ngujuar në thellësi të tokës që prej mbrëmjes së djeshme. Konfirmimi zyrtar për këtë ngjarje ka ardhur nga drejtori i ndërmarrjes “Trepça”, Shyqyri Sadiku, i cili ka bërë të ditur se situata ka marrë fund dhe se të gjithë punonjësit gëzojnë shëndet të plotë. Ngjarja kishte nisur të mërkurën në mbrëmje, ku gjithsej 63 minatorë mbetën të bllokuar në horizontet e minierës në Stantërg. Shkak i këtij ngujimi ishte bërë një defekt teknik në sistemin e furnizimit me energji elektrike. Sipas informacioneve zyrtare, prishja kishte ndodhur rreth orës 19:30, si pasojë e djegies së linjave të tensionit të lartë dhe një defekti të regjistruar në trafostacionin e tunelit të parë. Për shkak të kësaj situate, një pjesë e minatorëve ishin detyruar të përdornin rrugët alternative për të dalë jashtë. Fatmirësisht, pas ndërhyrjes për normalizimin e situatës, operacioni është mbyllur pa pasoja për jetën apo shëndetin e personelit.