Lajm i mirë nga miniera: 15 minatorë dalin të sigurt pas orëve të ankthit

Një grup prej 15 minatorësh kanë arritur të dalin shëndoshë e mirë nga miniera, duke i dhënë fund orëve të gjata të pasigurisë dhe pritjes së ankthshme që kishte mbërthyer familjarët dhe kolegët e tyre. Lajmin për shpëtimin e tyre e ka bërë të ditur asambleistja në Kuvendin Komunal të Mitrovicës së Veriut, Aida Doli. Përmes një postimi në rrjetet sociale, ajo e ka konfirmuar këtë zhvillim pozitiv, duke theksuar se dalja e tyre nga thellësia e minierës sjell një frymëmarrje të lehtësuar për të gjithë ata që po përcillnin situatën. “Pas orëve të vështira të ngujuar në thellësi, dalja e tyre është një lajm që sjell lehtësim e shpresë”, ka shkruar Doli në njoftimin e saj. Në mesazhin e saj, asambleistja Doli ka shprehur urimet më të sinqerta që edhe pjesa tjetër e minatorëve që ndodhen ende brenda, të dalin sa më parë pa pasoja dhe të bashkohen me familjet e tyre, duke mbajtur gjallë shpresën për një përfundim të mbarë të kësaj situate.