Drama në thellësi të Trepçës: Dëshmia e minatorit që u shpëtua nga horizonti i 11-të

Njëri nga 63 minatorët e bllokuar mbrëmjen e sotme në horizontin e 11-të të minierës së Trepçës ka rrëfyer momentet e vështira që përjetoi brenda galerive, pas një defekti teknik që ndërpreu energjinë elektrike. Minatori, i cili ka kaluar rreth dy orë e gjysmë nën tokë, tregoi se kjo është hera e tretë që përballet me një situatë të tillë të rrezikshme. Megjithëse ai e përshkroi gjendjen shëndetësore të kolegëve të tij si të qëndrueshme, ai nuk e fshehu shqetësimin për vështirësitë në frymëmarrje dhe stresin e akumuluar. “Gjendja shëndetësore ka qenë e mirë, por për shkak të mungesës së ventilimit, ajri bëhet i rëndë dhe vështirësohet frymëmarrja. Kjo është hera e tretë që ngujohem në minierë dhe me çdo herë, paniku dhe stresi shtohen”, deklaroi ai, duke shpjeguar se gjatë procesit të daljes kanë bërë pushime të shkurtra në çdo horizont. Në lidhje me procesin e evakuimit të pjesës tjetër të punëtorëve, minatori u shpreh se situata mbetet sfiduese për disa prej tyre. “Kolegët janë duke dalë gradualisht. Ata që e ndjejnë veten fizikisht më të fortë po ia dalin më lehtë, por për të tjerët besoj se është një proces mjaft i mundimshëm”, shtoi ai.