Ylli në ngjitje nga Ferizaj: Vlera Neziri, talenti që po shkëlqen në futbollin e femrave

Ferizaj ka nxjerrë një tjetër emër premtues në futbollin e femrave. Bëhet fjalë për Vlera Nezirin, e cila konsiderohet si një nga talentet më të spikatura të gjeneratës së saj në këtë sport. Neziri është pjesë e klubit ferizajas KF Vizionit KFF që nga mosha 8-vjeçare. Që nga hapat e parë në këtë skuadër, ajo ka dëshmuar përkushtim të jashtëzakonshëm dhe aftësi të rralla teknike në fushën e blertë. Ajo luan në rolin e mesfushores së avancuar, ndërsa përveç suksesit në futboll, Vlera njihet edhe për rezultatet e shkëlqyera në shkollë. Angazhimi dhe paraqitjet e saj konsistente nuk kanë kaluar pa u vënë re nga stafi teknik i Kombëtares së Kosovës. Prej një viti, ajo është bërë pjesë e rregullt e përfaqësueses së Kosovës për grupmoshën U-15, duke përfaqësuar vendin me dinjitet. Sipas futbollistes së talentuar, zhvillimi i saj profesional është meritë e drejtpërdrejtë e punës së trajnerëve Qerim Shaqiri – Rusi dhe Teuta Mehmeti. Ajo vlerëson lart përkushtimin e tyre për të nxjerrë më të mirën nga çdo lojtare. “Falë punës së dy trajnerëve, Qerim Shaqiri – Rusi, si dhe trajneres Teuta Mehmeti, që nuk kursejnë asgjë nga vetja për të na përgatitur sa më mirë dhe për ta përfaqësuar në radhë të parë KF Vizionin KFF, e nga kjo trampolinë të bashkohemi edhe në Kombëtaren e Kosovës. Unë u jam falënderuese trajnerëve që çdoherë janë në përkrahje tonë”, u shpreh Vlera. E ardhmja duket premtuese për Vlerën dhe bashkëlojtaret e saj, të cilat po përgatiten për një sfidë të re ndërkombëtare. Më 20 tetor, ekipi do të udhëtojë drejt Maltës për të marrë pjesë në një turne, i cili do të shërbejë si një mundësi ideale për talenten ferizajase që të dëshmojë edhe një herë potencialin e saj në arenën ndërkombëtare.