Apeli i Arta Bajramit për presidenten Shiroka-Pula: Prioritet urgjent projektligji për autizmin

Zgjedhja e Justina Shiroka-Pulës në krye të shtetit të Kosovës ka shkaktuar një valë reagimesh në opinionin publik, ku përveç zyrtarëve institucionalë, zërin e kanë ngritur edhe figura të njohura të skenës sonë. Ndër të parat që ka reaguar është këngëtarja e mirënjohur, Arta Bajrami. Përmes një mesazhi të publikuar në rrjetet sociale, ajo i është drejtuar drejtpërdrejt presidentes së re dhe lidershipit shtetëror, duke kërkuar angazhim konkret për një çështje tepër të ndjeshme. Bajrami ka kërkuar që Kuvendi i Kosovës ta trajtojë si çështje urgjente miratimin e projektligjit që rregullon statusin e fëmijëve me nevoja të veçanta, me theks të posaçëm te fëmijët me autizëm. Sipas saj, ky proces nuk duhet të zvarritet më tej. “Tani që Kosova ka bërë hapa drejt funksionalizimit të institucioneve, kërkesa jonë është e qartë: Projektligji për fëmijët me nevoja të veçanta, përkatësisht për autizmin, duhet të jetë ndër pikat e para të agjendës parlamentare. Fëmijët nuk mund të presin më”, ka theksuar këngëtarja. Duke uruar vendin për konsolidimin e institucioneve, Bajrami ka dërguar një mesazh të qartë për klasën politike, duke nënvizuar se koha për veprim është tani, pasi fëmijët në fjalë kanë pritur mjaftueshëm për një mbështetje meritore nga shteti.