Vrasja e 23-vjeçarit në Mat: SPAK mbyll hetimet dhe dërgon dosjen e Renis Dobrës për gjykim

Prokuroria e Posaçme ka finalizuar hetimet paraprake, duke i paraqitur Gjykatës së Posaçme kërkesën zyrtare për kalimin në gjykatë të dosjes penale që lidhet me rrëmbimin dhe ekzekutimin e 23-vjeçarit Renis Dobra, ngjarje e rëndë e regjistruar më 8 korrik 2025 në rajonin e Matit. Në përfundim të këtij procedimi penal, i regjistruar me numër 181 për vitin 2025, organi i akuzës ka ngritur zyrtarisht aktakuzën ndaj katër personave: Fation Bushgjokaj, Petrit Hoxha (i njohur ndryshe edhe me mbiemrin Çakri), Kristë Bushgjokaj dhe Aleksandër Bushgjokaj. Sipas dokumentit hetues të SPAK-ut, të pandehurit përballen me akuza të rënda penale, të cilat përfshijnë “Rrëmbimin ose mbajtjen peng të personit” në kuadër të bashkëpunimit të posaçëm të një grupi të strukturuar kriminal, “Grup i strukturuar kriminal”, si dhe “Kryerjen e veprave penale nga organizata kriminale dhe grupi i strukturuar kriminal”. Ngjarja e rëndë e ka zanafillën në mbrëmjen e 8 korrikut 2025, kohë kur Renis Dobra u mor peng në territorin e Matit, ndërsa hetimet dëshmojnë se autorët kishin organizuar një skenar të mirëkoordinuar për të gjurmuar dhe kapur të rinjtë. Analiza e hollësishme e provave, e mbështetur te pamjet e kamerave të sigurisë, sinjalet GPS të makinave me qira, si dhe te të dhënat e komunikimeve telefonike, ka zbardhur lëvizjet e autorëve. Sipas dosjes, 23-vjeçari u pikas fillimisht pranë “Urës së Matit” teksa drejtonte automjetin e tij tip Mercedes-Benz. Në ndjekje të tij ka qenë një mjet tip Hyundai Santa Fe, ku po udhëtonin Petrit Hoxha alias Çakri dhe Kristë Bushgjokaj, të cilët kanë luajtur rolin e vëzhguesit dhe sinjalizuesit për dy bashkëpunëtorët e tjerë, Fation dhe Aleksandër Bushgjokaj, që lëviznin me një automjet tip Range Rover. Rreth orës 21:58, mjeti Range Rover i ka prerë rrugën viktimës, duke e detyruar të ndalojë. Pasi e kanë nxjerrë me dhunë nga automjeti i tij, autorët e kanë futur forcërisht në mjetin e tyre dhe janë nisur drejt zonës së Ulzës dhe Shkopetit. Sipas rindërtimit të dinamikës nga organet e drejtësisë, gjatë këtij udhëtimi Renis Dobra është nënshtruar ndaj dhunës fizike, e cila i ka sjellë edhe vdekjen, konkluzion ky i mbështetur plotësisht nga ekspertiza mjeko-ligjore. Më pas, për të humbur gjurmët dhe fshehur provat e krimit, autorët dyshohet se kanë zhytur automjetin e viktimës së bashku me trupin e pajetë në ujërat e liqenit të Ulzës. Materialet filmike të siguruara nga qindra orë filmimesh të kamerave të sigurisë përgjatë aksit rrugor Burrel–Shkopet kanë qenë kyçe për të provuar se mjetet e përdorura nga autorët kanë përkuar në çdo detaj me itinerarin e viktimës. Në dosje përfshihen gjithashtu detaje të tjera identifikuese, siç janë tatuazhet e dallueshme në krahun e drejtuesit të mjetit Range Rover. Të katër të pandehurit ndodhen aktualisht nën masën e sigurisë “arrest në burg”, pasi Gjykata e Posaçme konfirmoi vendimin përkatës për Fation, Kristi, Aleksandër Bushgjokajn dhe Petrit Hoxhën gjatë muajit qershor. Kujtojmë se gjatë një prej seancave paraprake në ambientet e GJKKO-së, mes tre vëllezërve Bushgjokaj dhe bashkëpandehurit Petrit Hoxha pati një përplasje fizike, konflikt ky që dyshohet se erdhi si pasojë e dëshmive dhe deklarimeve të dhëna nga Hoxha lidhur me rolin e tyre në vrasjen e Renis Dobrës.