Rrëfimi prekës i gjyqtarit Lirim Jashari: Si u lëndua gjatë protestës duke mbajtur flamurin e UÇK-së

Gjyqtari i njohur i Superligës së Kosovës, Lirim Jashari, ka shpalosur detaje rrënqethëse nga momenti që e bëri atë viral në rrjetet sociale, gjatë protestave në Prishtinë ku kërkoheshin ndryshime në Ligjin e Speciales. I ftuar në emisionin “DPT te Fidani”, ai ka kujtuar me emocione të thella përballjen e tij me forcat e rendit, ndërsa mbante flamurin e Ushtrisë Çlirimtare të Kosovës. Jashari shpjegoi se ngjarja mori kthesë dramatike në sheshin “Skënderbeu”, ku protestuesit ishin mbledhur pas tensioneve të mëparshme. Ai kujtoi momentin kur organizatori Çlirim Haziri po përpiqej ta përmbyllte protestën, e cila kishte degjeneruar në përplasje të ashpra. Pamja e nënës së Hazirit dhe gjendja e rënduar e këtij të fundit ishin momentet e para që e goditën rëndë emocionalisht gjyqtarin. Situata u përshkallëzua kur Policia filloi përdorimin e gazit lotsjellës mbi turmën. Në ato çaste kaosi, Jashari vuri re Granit Zogjanin, djalin e një dëshmori, i cili po mbante flamurin e UÇK-së. I shtyrë nga një ndjenjë e thellë revolte, ai vendosi t’ia merrte flamurin të riut dhe t’u afrohej pjesëtarëve të Policisë, me qëllimin e vetëm për t’u treguar atyre se mbi kë po ushtronin dhunë. “Edhe pse e dija se ishte e rrezikshme, vendosa t’ia marr flamurin atij djalit dhe t’u afrohem policëve për t’u treguar se ndaj kujt po gjuanin”, ka rrëfyer Jashari. Gjatë këtij konfrontimi, gjyqtari pretendon se është goditur, gjë që i shkaktoi lëndime të rënda, përfshirë thyerjen e këmbës. Duke e përmbyllur rrëfimin, Jashari nuk mundi t’i mbante lotët. Ai theksoi se ajo që e kishte lënduar më së shumti nuk ishte dhimbja fizike, por fakti se kishte parë fëmijët e dëshmorëve të vendit duke u trajtuar në atë mënyrë. “U emocionova shumë kur i pashë fëmijët e dëshmorëve duke u sulmuar në atë mënyrë”, përfundoi ai me zërin e thyer.