Hapa konkretë për NPL “Eko Drenasi”: Diskutohet përzgjedhja e Kryeshefit dhe nisja e plotë e punës

Komisioni Komunal i Aksionarëve të NPL “Eko Drenasi” ka mbajtur një takim pune me drejtorët e Bordit të Përkohshëm, në kuadër të përpjekjeve intensive për jetësimin dhe funksionalizimin e plotë të kësaj ndërmarrjeje publike. Në këtë mbledhje morën pjesë përfaqësuesit e Komisionit, Laureta Thaqi nga ekzekutivi, si dhe Driton Ajazi e Naim Gjeli nga Kuvendi i Komunës. Ndërkaq, Bordin e Përkohshëm e përfaqësuan Arsim Rashiti, Blerina Gashi, Petrit Muleta dhe Valentina Leku-Gashi. Gjatë diskutimeve u shqyrtuan zhvillimet aktuale, ku fokus i veçantë iu kushtua procedurave për shpalljen dhe zgjedhjen e Kryeshefit Ekzekutiv, regjistrimit zyrtar të ndërmarrjes, si dhe detyrave të tjera paraprake drejt operimit të plotë. Sipas autoriteteve, vënia në funksion sa më parë e ndërmarrjes “Eko Drenasi” mbetet prioritet kyç për banorët e kësaj komune, sidomos duke marrë parasysh sfidat aktuale në fushën e menaxhimit të mbeturinave. Fokusi kryesor i veprimtarisë së kësaj ndërmarrjeje do të jetë mirëmbajtja e hapësirave publike dhe pastrimi i mbeturinave ilegale, me qëllim ngritjen e cilësisë së shërbimeve dhe sigurimin e një mjedisi sa më të pastër për komunitetin. Në përfundim të takimit, Komisioni i Aksionarëve dhe Bordi i Përkohshëm u dakorduan që të vazhdojnë bashkëpunimin e ngushtë institucional për përmbylljen me sukses të të gjitha procedurave, që NPL “Eko Drenasi” të nisë ofrimin e shërbimeve për qytetarët në një kohë sa më të shkurtër.