Paralajmërim nga DPHM: Priten temperatura deri në 28 gradë dhe ndryshim i motit në fundjavë

Departamenti i Hidrometeorologjisë njofton se vendi ynë do të përfshihet nga një periudhë moti me diell dhe relativisht i ngrohtë gjatë ditëve në vijim. Sipas parashikimeve zyrtare, mëngjesi i nesërm do të nisë i kthjellët, ndërsa gjatë ditës pritet mbizotërim i diellit dhe vranësira kalimtare nga të lehtat deri mesatare. Në rajonet malore të perëndimit nuk përjashtohen mundësitë për reshje të izoluara shiu. Gjatë kësaj kohe do të fryjë erë e lehtë deri mesatare nga drejtimi jugor, e cila do të jetë më e ndjeshme përgjatë Luginës së Vardarit. Sa i përket vlerave termike, termometrat në orët e mëngjesit do të shënojnë nga -1 deri në 7 gradë Celsius, kurse gjatë ditës temperaturat maksimale do të lëvizin nga 22 deri në 28 gradë. Në kryeqytet do të mbajë mot me diell, shoqëruar me vranësira të pakta dhe erë të lehtë me drejtim të ndryshueshëm. Në Shkup, temperatura minimale do të zbresë në 4 gradë, ndërsa ajo maksimale do të ngjitet deri në 27 gradë Celsius. Megjithatë, situata meteorologjike do të pësojë kthesë duke filluar nga dita e premte, përgjatë fundjavës dhe përsëri të martën. Gjatë këtyre ditëve parashikohet mot i ndryshueshëm, i shoqëruar me vranësira dhe reshje të kohëpaskohshme shiu, të cilat në disa rajone pritet të jenë më të theksuara dhe intensive. Lokalisht, reshjet mund të marrin karakter të rrëmbyeshëm dhe të shoqërohen me bubullima të izoluara, ndërkohë që temperaturat minimale të mëngjesit do të shënojnë rritje.