Përplasja GJKKO-Avokati, nga qelia Meta lëshon alarmin: Ndërhyrni urgjentisht, situatë e evitueshme

Nga qelia e paraburgimit, Ilir Meta ka reaguar ashpër ndaj përplasjes institucionale mes Gjykatës së Posaçme të Shkallës së Parë dhe Dhomës Kombëtare të Avokatisë, duke e cilësuar këtë situatë si një konflikt plotësisht të panevojshëm dhe të shmangshëm. Në një postim të zgjeruar në rrjetet sociale, ai ka tërhequr vëmendjen te pasojat e rënda që po sjell shtyrja e dhjetëra seancave gjyqësore, duke dëmtuar proceset e rregullta ligjore, vetë avokatët, por edhe interesat e qytetarëve. Meta ka vënë në shënjestër edhe heshtjen e ekzekutivit dhe legjislativit, duke kërkuar angazhim konkret për t'i dhënë fund ngërçit përmes ndryshimeve në ligjin për Avokatin. Sipas tij, kjo qasje po gërryen besimin e qytetarëve te sistemi i drejtësisë dhe kërkon nisjen e menjëhershme të dialogut. Duke u ndalur te çështja e tij personale në GJKKO, ish-presidenti siguron se ka qenë i pranishëm në çdo seancë dhe ka shprehur gatishmërinë për vijimin e procesit. Megjithatë, ai kritikoi ashpër vendimin për pezullimin e afateve të paraburgimit pa caktuar më parë një avokat kryesisht, duke e lidhur këtë me atë që e cilëson si “Ramaformë”. E gjithë kjo situatë e tensionuar mes GJKKO-së dhe Dhomës Kombëtare të Avokatisë është vlerësuar nga Meta si e evitueshme, pasi Rregullorja e GJKKO-së së Shkallës së Parë është miratuar më 17 korrik 2026, është bërë publike më 31 korrik dhe ka hyrë zyrtarisht në fuqi më 1 shtator 2026. Sipas tij, pasojat e këtij ngërçi përfshijnë dhjetëra gjyqe të zvarritura, cënim të standardeve të procesit të rregullt ligjor dhe dëmtim të buxhetit të shtetit, i cili paguan për transportimin e të paraburgosurve nga burgjet e rretheve në Tiranë, krahas faturës financiare që rëndon mbi të pandehurit dhe familjet e tyre. Meta thekson se mosveprimi i qëllimshëm i Kuvendit dhe Qeverisë flet më shumë sesa vetë konflikti në fjalë. Ai e cilëson këtë heshtje si tejet sarkastike në një kohë kur pushteti u jep leksione të tjerëve mbi të drejtat e njeriut dhe funksionin e avokatit në proceset penale. Për këtë arsye, ai kërkon që Kuvendi të lërë mënjanë indiferencën, të nxisë tryezën e dialogut mes palëve dhe të ndërhyjë në ligjin për Avokatin, në mënyrë që t'i jepet zgjidhje dosjeve të shumta që presin drejtësi dhe të ndalet ky kaos shkatërrues për besimin publik. Këtë qëndrim publik, sipas tij, e ka shoqëruar edhe me hapa institucionalë të ndërmarrë që prej 24 shtatorit 2026 nga kreu i Grupit Parlamentar të Partisë së Lirë, Tedi Blushi. Në cilësinë e personit në gjykim, Meta përsërit se jo vetëm ka marrë pjesë në çdo seancë të deritanishme, por ka dhënë vullnetin e tij të qartë për të vazhduar gjykimin në përputhje me Kodin e Procedurës Penale. Ai shpreh habi se si prokurori kërkoi pezullimin e afateve të paraburgimit të tij, por nuk kërkoi caktimin e një avokati kryesisht, ndërsa gjykata pranoi një kërkesë të tillë duke anashkaluar detyrimet ligjore, si pasojë e një skenari me prapavijë politike. Këto zhvillime, sipas Metës, nuk kanë asnjë lidhje me Reformën në Drejtësi të datës 21 korrik 2016, por përfaqësojnë deformimin e saj në atë që ai e quan “Ramaformë”, e cila sipas tij po shkatërron me dashje shtetin e së drejtës. Në shenjë respekti për opinionin publik, ai rithekson se që nga nisja e gjykimit paraprak e deri më sot, nuk ka munguar dhe nuk ka ndërmend të mungojë në asnjë seancë gjyqësore.