Asetet e sekuestruara rrezikojnë të kthehen te krimi? Tabaku lëshon alarmin: Qeveria kërkon centralizim pa transparencë

Deputetja e Partisë Demokratike, Jorida Tabaku, ka kërkuar garanci të plota ligjore që pasuritë e sekuestruara dhe të konfiskuara nga krimi i organizuar nuk do të përfundojnë sërish në duart e individëve të lidhur me aktivitetet e paligjshme. Ky shqetësim u ngrit gjatë fjalës së saj në Komisionin për të Drejtat e Njeriut dhe Mjetet e Informimit Publik, ku ajo analizoi nismën e ekzekutivit për zgjerimin e kompetencave të Agjencisë së Administrimit të Pasurive të Sekuestruara dhe të Konfiskuara. Duke vënë theksin te rëndësia e luftës kundër pastrimit të parave, Tabaku u shpreh se kjo betejë kërkon institucione me kapacitete reale operacionale, bashkëpunim ndërinstitucional dhe standarde të larta transparence. Ajo ngriti pikëpyetje të forta nëse qeveria po ndërton një mekanizëm efektiv që gjurmon paranë kriminale deri në fazën e shitjes finale të aseteve, apo thjesht po ndërmerr një centralizim burokratik të administrimit të tyre. “Pastrimi i parave është një rrezik për ekonominë tonë dhe lufta kundër tij është një nga prioritetet e procesit të integrimit. Shqetësimi im është ky: a po ndërtoni një sistem të mbyllur, që e ndjek paranë kriminale deri në përdorimin përfundimtar të këtyre aseteve që do të nxirrni në shitje, apo thjesht po centralizoni administrimin? Kolegët këtu pyetën për transparencën. Çfarë procedurash do të përdorni? Cilat janë procedurat e verifikimit të duhur, ‘due diligence’, që këto asete të mos përfundojnë në duart e atyre të cilëve u janë sekuestruar?” – deklaroi Tabaku gjatë mbledhjes. Sipas projektligjit në shqyrtim, Agjencia e Administrimit të Pasurive të Sekuestruara dhe të Konfiskuara pritet të marrë nën kujdes jo vetëm pronat e sekuestruara nga organet e drejtësisë, por edhe ato që burojnë nga proceset administrative në sektorin e ndërtimit. Deputetja demokrate e cilësoi këtë bashkim si një qasje të gabuar, duke argumentuar se pronat nga hetimet penale dhe ato nga procedurat administrative kanë histori, qëllime dhe procedura krejtësisht të ndryshme. Ajo shtoi gjithashtu se ky zgjerim i funksioneve dhe i volumit të punës vjen pa fonde shtesë dhe pa ndonjë ndikim në buxhet, çka do të thotë se agjencia do të menaxhojë më shumë asete, përfshirë edhe kriptomonedhat në një fazë të dytë, pa pasur rritje të kapaciteteve njerëzore apo teknike. Tabaku theksoi nevojën urgjente që Kuvendi të miratojë një ligj të posaçëm për kriptomonedhat, pasi ky sektor mbetet i parregulluar dhe shpesh abuzohet nga grupet kriminale. Në fjalën e saj, ajo u ndal edhe te mungesa e koordinimit mes institucioneve përgjegjëse, duke përmendur organet e drejtësisë, zyrën e posaçme pranë Policisë së Shtetit në varësi të Ministrisë së Brendshme dhe vetë agjencinë, ndërkohë që projektligji nuk ofron qartësi mbi mekanizmat e bashkëpunimit mes tyre. Gjatë kësaj analize, Tabaku kujtoi se vetëm nga dy operacionet e fundit të SPAK-ut janë sekuestruar 439 prona, vlera e të cilave arrin në 289 milionë euro, duke dëshmuar përmasat e mëdha të pasurive që kërkojnë menaxhim të rreptë dhe të sigurt.