“Shteti s’është lojë!” Adelina Thaçi lëshon thirrjen e fortë: LDK të kthejë kurrizin inateve dhe pazareve

Ish-deputetja e Lidhjes Demokratike të Kosovës, Adelina Thaçi, ka ngritur alarmin përmes një reagimi të ashpër lidhur me skenën aktuale politike në vend. Ajo ka kërkuar nga subjekti i saj politik që të reflektojë dhe të vendosë parimet mbi çdo interes të ngushtë personal, duke theksuar se institucionet nuk guxojnë të trajtohen si shesh lojërash. Thaçi ka bërë të ditur se zhvillimet e fundit i ka përcjellë me shqetësim të thellë, fillimisht në cilësinë e qytetares, pastaj si krijuese e artit dhe ish-përfaqësuese e popullit në Kuvend. “Kur je jashtë, shumë gjëra i sheh ndryshe. I thua vetes: ‘Kadale, ndoshta nuk i dimë krejt, ndoshta po paragjykojmë’. Por kur hyn brenda dhe e sheh se si funksionojnë gjërat, zhgënjehesh”, ka shkruar ajo në rrjetin social Facebook. Ajo ka vlerësuar si tejet shqetësues faktin se shteti po shihet si një lojë, ndërsa nevojat e qytetarëve mbeten në plan të dytë përballë ambicieve personale. “Të dhemb kur sheh se si shteti trajtohet sikur të jetë një lojë. Kur interesat personale shpesh dalin përpara interesit të qytetarit. Kur sheh njerëz të udhëhequr nga frustrimet e veta, njerëz që zvarriten pas një pozite, njerëz që brenda pak sekondash e ndërrojnë fjalën”, ka deklaruar Thaçi. Sipas saj, zëri dhe interesi i qytetarit shpesh mungojnë krejtësisht në këto dinamika politike, gjë që përbën aspektin më të dhimbshëm të situatës. Duke bërë një paralelizëm, ajo ka përmendur koncertin e sopranos Ermonela Jaho, duke u shprehur se arti dhe kultura i dhuruan publikut shpresë dhe energji pozitive për disa orë, ndërkohë që në Kuvend po ndodhnin situata të çuditshme. Ish-deputetja ka adresuar kritika të drejtpërdrejta edhe ndaj partisë së saj, duke potencuar se përkushtimi ndaj një subjekti politik nuk duhet të tejkalojë kurrë parimet që ai synon të mbrojë. “Nëse nuk kthjelleni, nëse nuk tregoni se dini të merrni vendime, të jeni konsistentë në atë që mendoni se është e drejtë, të këmbëngulni kur duhet dhe të lini anash inatet personale e pazaret e vogla, atëherë do të shkoni aty ku nuk dëshiron askush që ju ka besuar”, ka shtuar ajo, duke sqaruar se ky reagim buron nga dhimbja dhe pamundësia për të heshtur e jo nga ndonjë hatërmbetje. Në vijim, Thaçi i ka dërguar një urim publike presidentes së re, Justina Shiroka-Pula, duke i uruar shëndet, mbarësi në detyrë dhe forcë për ta përmbyllur mandatin me integritet të lartë. “Pas gjithë kësaj që kemi kaluar, çdo ditë që Kosova zgjohet pa një tjetër krizë, pa një tjetër përplasje dhe pa një tjetër frikë për zgjedhje të reja, është një ditë e fituar për qytetarin”, ka shkruar ajo. Në mbyllje të reagimit të saj, Thaçi ka theksuar se populli është ngopur me situata të tilla dhe se vendi ka nevojë urgjente për paqe, llogaridhënie dhe punë konkrete. “Ky popull është lodhur. Jemi lodhur të gjithë. Tani na duhet qetësi, përgjegjësi dhe punë. Partia ime, Zoti të ndihmoftë. Por mbi të gjitha, kthjellohu”, përfundon shkrimin e saj ajo.