Incident i rëndë në Ferizaj: Sulmohet fizikisht dhe grabitet ekipi i emisionit “Kiks Kosova”

Një ngjarje e rëndë ka ndodhur në qytetin e Ferizajt, ku ekipi i emisionit investigativ “Kiks Kosova” është bërë cak i një sulmi fizik nga tre persona ende të paidentifikuar, teksa po zhvillonin detyrat e tyre zyrtare në terren. Sipas të dhënave paraprake nga gazetarët që raportojnë nga vendi i ngjarjes, incidenti ka ndodhur në kohën kur automjeti i stafit është bllokuar papritur në rrugë nga dy makina të tjera. Nga mjetet e ndaluara kanë dalë të paktën tre sulmues, të cilët kanë përdorur dhunë ndaj anëtarëve të ekipit dhe më pas u kanë grabitur edhe pajisjen e punës, konkretisht kamerën. Si pasojë e këtij sulmi të dhunshëm, dy prej punonjësve të medias kanë pësuar lëndim trupor dhe janë dërguar menjëherë për kujdes mjekësor në Qendrën Emergjente pranë Qendrës Klinike Universitare të Kosovës (QKUK). Vlen të theksohet se, gjatë momentit të ndodhjes së incidentit, stafi mediatik nuk ka qenë duke realizuar ndonjë xhirim, por po qarkullonte me veturën e tyre nëpër qytet.