Zemaj pas zgjedhjes së presidente: Lojërat politike mes VV-së dhe PDK-së morën fund përfundimisht

Deputeti i Lidhjes Demokratike të Kosovës, Armend Zemaj, ka komentuar zgjedhjen e Justina Shiroka – Pula në krye të shtetit, duke theksuar se ky zhvillim dëshmon se Lëvizja Vetëvendosje pranon një figurë politike për presidente kur ajo vjen nga radhët e PDK-së, por jo kur propozohet nga LDK-ja. “Dje, Kuvendi i Kosovës i dha vendit Presidenten e re, pas një procesi të gjatë me debate, pritje, prapaskena, kushtëzime dhe lojëra politike në stilin e ping-pongut. Por e vërteta, herët a vonë, del në shesh. Dhe dje u shpalosën qartë dy të vërteta politike. E para: për VV-në mund të jetë i pranueshëm një president politik që vjen nga PDK-ja, por jo një president politik që vjen nga LDK-ja. Vetëm nga LDK kërkohej konsensual??”, ka deklaruar Zemaj përmes një reagimi. Në vazhdim, ligjvënësi i LDK-së u ndal edhe te votimi i ndryshimeve ligjore për Dhomat e Specializuara, duke vlerësuar se ky veprim dëshmon pranimin e këtij institucioni nga ana e partisë në pushtet. “E dyta: VV votoi për ndryshimet në Ligjin për Dhomat e Specializuara dhe Zyrën e Prokurorit të Specializuar, pra, në praktikë, pranoi edhe vetë ekzistencën dhe juridiksionin e Gjykatës Speciale në Hagë. Këto nuk janë më vetëm debate politike as ndarje ideologjike por janë veprime e votime të regjistruara në Kuvend. Dje, ping-pongu politik VV - PDK mori fund. Votat treguan shumë më tepër se fjalët”, ka përfunduar ai.