Harry Kane lë të hapur mundësinë për të ndjekur rekordin historik të Cristiano Ronaldos

Harry Kane vazhdon të lërë gjurmë të pashlyeshme në histori me fanellën e Anglisë, ndërsa pas një tjetër paraqitjeje fantastike ka paralajmëruar se në të ardhmen mund të synojë edhe shifrën e jashtëzakonshme të golave që Cristiano Ronaldo mban në arenën ndërkombëtare. Sulmuesi kryesor i “Tre luanëve” tundi dy herë rrjetën në triumfin 3-0 kundër Çekisë, duke e çuar në 91 numrin e përgjithshëm të golave me përfaqësuesen, ndërkohë që barazoi edhe shifrën prej 125 paraqitjesh të legjendës Peter Shilton. Megjithëse është golashënuesi më i mirë në histori të Kombëtares angleze, Kane nuk ka ndërmend të tërhiqet nga futbolli ndërkombëtar dhe pranoi hapur se rekordi i portugezit mund të kthehet në një sfidë reale nëse ruan këtë ritëm të lartë. “Do të shohim sa larg mund të shkojë. Aktualisht jemi te 50 e ca gola larg dhe është një rrugë shumë e gjatë, por kush e di? Jam në formë të shkëlqyer”, u shpreh ai. Nga ana e tij, Cristiano Ronaldo, 41-vjeçar, mban kreun e golashënuesve më të mirë në historinë e futbollit kombëtar me plot 146 realizime për Portugalinë, shifër kjo që mbetet maja e futbollit botëror. Pavarësisht kësaj, kapiteni anglez bëri të qartë se nuk ka caktuar ndonjë datë apo afat se kur do t'i japë fund karrierës me fanellën e vendit të tij. “Kam thënë edhe më parë se disa prej lojtarëve me të cilët kam luajtur kanë vazhduar deri në fund të të 30-ave dhe madje edhe në të 40-at, duke luajtur në nivelin më të lartë. Për mua është sezon pas sezoni. Për sa kohë që ndiej se mund ta ndihmoj ekipin, do të jem këtu”, shtoi sulmuesi. Përballja ndaj Çekisë mbajti një peshë të veçantë për Kane, pasi përveç golave, ai arriti rekordin e ndeshjeve të mbajtura nga Peter Shilton. Kujtojmë se sulmuesi kishte debutuar në vitin 2015, duke shënuar golin e tij të parë vetëm 79 sekonda pasi kishte shkelur në fushë. Pas ndeshjes, trajneri Thomas Tuchel nuk i ka kursyer elozhet për kapitenin e skuadrës së tij. “E pabesueshme. Ai e meriton këtë skenë dhe të gjitha këto vlerësime”, u shpreh tekniku gjerman. Sipas Kane, sekreti i këtij suksesi afatgjatë qëndron te besimi i palëkundur në forcat e veta dhe puna e palodhur në çdo seancë stërvitore. “Gjithmonë kam pasur shumë besim në vete. Gjithmonë kam qenë i gatshëm të bëj ndoshta më shumë se të tjerët dhe ta shtyja veten përtej limiteve. Kam kombinuar talentin që kam me shumë punë, besim, përkushtim dhe disiplinë”, theksoi ai. Sulmuesi, i cili po kalon një formë të shkëlqyer edhe në nivel klubesh me fanellën e Bayern Munichut, beson se hapësirat për t'u përmirësuar janë ende të pranishme, pavarësisht bagazhit të madh të përvojës. “Po vij nga sezoni im më i mirë ndonjëherë si futbollist dhe e kam nisur këtë sezon po aq mirë sa atë të kaluarin. Jam në një moment të mirë dhe tani për mua gjithçka ka të bëjë me ta shtyrë veten dhe të shoh se sa larg mund të arrij”, deklaroi ai. Që prej largimit nga Tottenhami, ku u shndërrua në golashënuesin historik të klubit, Kane ka vazhduar të thyejë rekorde edhe në Bundesligë, duke u bërë lojtari më i shpejtë i Bayernit që arrin kuotën e 100 golave brenda vetëm 98 ndeshjeve. “Unë nuk do të ndalem. Do të vazhdoj të shtyhem përpara dhe të shoh se ku do të më çojë kjo. Ndoshta pas rreth 10 vjetësh do ta shohim se ku është tavani im”, përfundoi Kane.