Tre vjet nga 7 Tetori, Von der Leyen: Vunë në pah terrorin e pashoq, paqja është e vetmja rrugë

Presidentja e Komisionit Evropian, Ursula von der Leyen, ka shënuar trevjetorin e sulmeve terroriste të 7 tetorit në Izrael, duke rikonfirmuar mbështetjen e palëkundur të Bashkimit Evropian për viktimat, të afërmit e tyre dhe personat që u morën peng gjatë kësaj ngjarjeje tragjike. Përmes një deklarate zyrtare, zyrtarja e lartë e BE-së theksoi se aktet e dhunës ekstreme nuk kanë asnjë lloj arsyetimi, ndërsa riafirmoi angazhimin e bllokut evropian për të kontribuar në kthimin e armëpushimit aktual në një paqe afatgjatë, e cila mbështetet te formula e dy shteteve. “Sot shënohen tre vjet që nga sulmet terroriste të 7 tetorit në Izrael. Ne nderojmë viktimat dhe qëndrojmë pranë familjeve që ende mbajnë peshën e rëndë të pikëllimit. Kujtojmë jetët e reja që u ndërprenë në një festival muzikor. Dhe përvojën e gjatë të pengjeve. BE qëndron pranë të gjithë atyre, jetët e të cilëve u ndryshuan përgjithmonë nga ajo ditë”, ka shkruar ajo në mesazhin e saj. Duke vënë theksin te domosdoshmëria e parandalimit të ngjarjeve të tilla në të ardhmen, ajo shtoi: “Egërsia dhe terrori i papërshkrueshëm i 7 tetorit nuk duhet të ndodhë më kurrë. BE mbetet e gatshme të ndihmojë në shndërrimin e armëpushimit të brishtë të sotëm në një paqe të qëndrueshme, të bazuar në një zgjidhje me dy shtete. Dhe mbetet po aq e bindur se asgjë nuk e justifikon terrorin”.