Kthesë historike: Trump autorizon ekzekutimin me skuadër zjarri të autorit të masakrës në Fort Hood

Presidenti Donald Trump ka dhënë miratimin për zbatimin e dënimit me vdekje përmes skuadrës së zjarrit ndaj Nidal Malik Hasanit, ushtarit të shpallur fajtor për sulmin terrorist në bazën ushtarake Fort Hood në Teksas, ngjarje e ndodhur në vitin 2009. Ky vendim shënon një precedent të rrallë në historinë moderne të drejtësisë ushtarake amerikane. Sipas njoftimit të bërë nga zëdhënësi i Pentagonit, Sean Parnell, ky vendim erdhi pas rekomandimit të Sekretarit të Mbrojtjes, Pete Hegseth. Tashmë, i mbetet Ministrisë së Mbrojtjes që të caktojë vendndodhjen dhe datën e saktë kur do të ekzekutohet dënimi ndaj Hasanit, i cili është cilësuar zyrtarisht si terrorist i dënuar. Kujtojmë se më 5 nëntor të vitit 2009, majori Nidal Hasan, në atë kohë psikiatër ushtarak, kreu një masakër të përgjakshme duke hapur zjarr ndaj kolegëve të tij në Fort Hood. Nga ky akt kriminal humbën jetën 13 persona, ndërsa 32 të tjerë mbetën të plagosur. Në vitin 2013, ai u dënua me vdekje dhe që nga ajo periudhë mbahet në një burg federal të sigurisë së lartë në shtetin e Kansasit. Ky vendim është historik, pasi Ushtria e SHBA-së nuk ka kryer asnjë ekzekutim të një ushtari që nga viti 1961, ndërsa metoda e skuadrës së zjarrit nuk është aplikuar që nga përfundimi i Luftës së Dytë Botërore. Dokumentet e brendshme konfirmojnë se përgatitjet për këtë proces kishin nisur prej kohësh, duke hapur rrugën që ekzekutimi të realizohet brenda afatit prej 150 ditësh nga miratimi presidencial.