Propozimi i Kurtit për presidente: Justina Shiroka-Pula reagon pas nominimit të papritur

Justina Shiroka-Pula është emri që lideri i Lëvizjes Vetëvendosje, Albin Kurti, ka hedhur në tryezë si kandidaturë për postin e Presidentit të vendit. Ky propozim erdhi në një mënyrë të papritur, pasi Kurti e bëri publik emrin e saj gjatë një konference për media, pa një konsultim paraprak me vetë të nominuarën. Në një prononcim të shkurtër për media, pas këtij zhvillimi, Shiroka-Pula ka shmangur komentet e hollësishme politike, duke u kufizuar në një përgjigje të shkurtër për shkak të angazhimeve të saj personale. Ajo bëri të ditur se për momentin është e zënë me pritjen e disa vizitorëve. “Aktualisht kam mysafirë nga Sarajeva”, është shprehur shkurtimisht Shiroka-Pula, duke mos dhënë detaje të tjera lidhur me ofertën e bërë nga kreu i qeverisë. Gjatë konferencës, Kurti e ka arsyetuar këtë propozim duke u bërë thirrje aktorëve të tjerë politikë që ta marrin parasysh këtë emër. Duke iu referuar së kaluarës së saj politike, ai theksoi: “Le ta bind Bedri Hamza, ka qenë ministre e PDK-së”, duke nënkuptuar se përvoja e saj e mëparshme në qeverisje mund të jetë një element kyç për sigurimin e mbështetjes së gjerë.