Filipçe propozon veting gjithëpërfshirës: Nga Zaevi e Sheqerinska, te Mickoski

Kryetari i LSDM-së, Venko Filipçe, ka prezantuar sot shtyllat kryesore të Master Planit të partisë së tij, duke vënë theksin te rikthimi i sundimit të ligjit dhe integrimi evropian. Një ndër pikat më të diskutuara të këtij plani është nisma për një ligj të veçantë për vetingun, i cili do të përfshinte kontrollin e detajuar të të gjithë zyrtarëve publikë, pa asnjë dallim politik. Në fushën e reformave në drejtësi, Filipçe ka paralajmëruar një qasje radikale që synon të rivendosë besimin e humbur të qytetarëve. Ai deklaroi se është i gatshëm që procesi i vetingut të nisë fillimisht nga vetë ai, për të vijuar më pas me figurat kyçe të LSDM-së, si ish-kryeministri Zoran Zaev, ish-ministrja Radmilla Sheqerinska dhe Petre Shilegovi. Sipas Filipçes, ky proces duhet të jetë gjithëpërfshirës dhe të shtrihet edhe te zyrtarët aktualë të OBRM-PDUKM-së, në krye me kryeministrin Hristijan Mickoski. Plani i propozuar parasheh angazhimin e ekspertëve të huaj për të garantuar paanshmëri dhe transparencë. Një komponent thelbësor i këtij procesi do të jetë verifikimi i origjinës së pasurisë, jo vetëm për zyrtarët, por edhe për kompanitë e mëdha që kanë bashkëpunuar me shtetin gjatë dekadës së fundit. “Kemi krijuar një mekanizëm ku do të kontrollohet pasuria e atyre që kanë realizuar fitime të mëdha në kurriz të buxhetit të shtetit. Për këto kompani, ligji do të parashikojë nene të posaçme për taksim shtesë, në mënyrë që fondet e përfituara në mënyrë të dyshimtë të kthehen atje ku e kanë vendin, në arkën e shtetit”, deklaroi lideri i opozitës maqedonase. Në përmbyllje, Filipçe nënvizoi se Master Plani i LSDM-së nuk është thjesht një dokument politik, por një strategji konkrete për të luftuar korrupsionin dhe për të siguruar që drejtësia të jetë e barabartë për të gjithë, duke i dhënë përparësi absolute rrugës evropiane të vendit.