Mbledhje urgjente e kabinetit qeveritar: Miratohen projektligje kyçe dhe vendime të rëndësishme

Kabineti qeveritar ka zhvilluar një mbledhje elektronike gjatë orëve të mbrëmjes të së martës, ku ka marrë një sërë vendimesh të rëndësishme, përfshirë miratimin e disa projektligjeve dhe programeve zhvillimore. Ndër vendimet kryesore të kësaj mbledhjeje spikat miratimi i Programit të Projektligjeve të Qeverisë për periudhën 2026–2028, si dhe i Projektligjit për Regjistrimin e Bujqësisë. Ky i fundit përcakton qartë Kornizën e organizimit dhe zbatimit të procesit të regjistrimit bujqësor në vend, duke rregulluar aspektet e mbledhjes, përpunimit, ruajtjes dhe shpërndarjes së të dhënave zyrtare statistikore. Po ashtu, ekzekutivi ka marrë vendim për ngritjen e Komisionit Qendror, i cili do të merret me vlerësimin e dëmeve nga fatkeqësitë natyrore dhe emergjenca të tjera, në kuadër të Agjencisë së Menaxhimit Emergjent. Krahas kësaj, është formuar edhe komisioni përzgjedhës për tre kandidatë për anëtarë të jashtëm të Bordit të Pavarur për Masat e Përkohshme për Produktet Themelore, të cilët do të veprojnë në situata të veçanta të çrregullimit të tregut. Në fushën e ekonomisë dhe cilësisë, është miratuar Koncept-dokumenti për Fushën e Akreditimit, që synon avancimin e infrastrukturës së cilësisë dhe harmonizimin e legjislacionit vendor me standardet dhe direktivat e Bashkimit Evropian. Qeveria ka aprovuar gjithashtu lëvizjen dhe rialokimin e fondeve buxhetore për Ministrinë e Infrastrukturës dhe Transportit, me qëllim mbështetjen e projekteve që realizohen përmes bashkëfinancimit me komunat. Axhenda e mbrëmjes përfshiu edhe miratimin e Programit për Mbrojtjen e Konsumatorëve të Cenueshëm të Energjisë Elektrike në Kosovë për vitet 2026–2027, si dhe Programit Vjetor 2026 për Rezervat Shtetërore të Mallrave. Një vëmendje i është kushtuar edhe sektorit energjetik përmes miratimit të Projektligjit për Efiçiencë të Energjisë. Ky dokument përcakton mekanizmat dhe caqet për nxitjen e efiçiencës, kursimin e energjisë, forcimin e sigurisë energjetike, ruajtjen e mjedisit dhe zbutjen e varfërisë energjetike. Në mbyllje të këtij takimi, kabineti qeveritar i ka dhënë dritën jeshile kërkesës së Komisionit të Pavarur për Miniera dhe Minerale për konfirmimin e interesit të përgjithshëm publik lidhur me zhvillimin e aktiviteteve përkatëse nga ndërmarrja publike “Trepça” Sh.A.