Hamza refuzon kushtëzimet e Kurtit: Ligji për Specialen nuk mund të përdoret si pazar për presidentin

Kryetari i Partisë Demokratike të Kosovës, Bedri Hamza, ka dhënë një përgjigje të prerë ndaj propozimit të kryeministrit Albin Kurti, i cili ka ndërlidhur miratimin e leximit të dytë të Projektligjit për ndryshimin e Ligjit për Dhomat e Specializuara me zgjedhjen e presidentit të ri. Kryeministri Kurti kishte hedhur në tavolinë emrat e Glauk Konjufcës dhe Feride Rushtit si kandidatë për president, duke i vendosur ata si kusht paraprak për kalimin e ligjit në fjalë. Kjo qasje është hedhur poshtë fuqishëm nga lideri i PDK-së. Sipas Hamzës, kjo mënyrë e të bërit politikë nuk është aspak serioze për sfidat me të cilat po ballafaqohet vendi. Ai e ka cilësuar këtë situatë si një përpjekje për të bërë pazare në momentet e fundit dhe për të shantazhuar proceset politike. “Kjo çka po shohim dhe dëgjojmë nuk është serioze për vendin dhe temat që po bisedojmë. Kjo temë po tentohet të shndërrohet në pazare të minutave të fundit. E kam thënë dhe po e ripërsëris se çështja e ligjit nuk është temë që i takon vetëm PDK-së... Qëllimi i kësaj teme është si ta përdori ligjin për shantazh për të arritur qëllimin politik, që të ketë një president politik dhe ta përmbyllë 100 për qind kapjen e institucioneve të shtetit”, u shpreh Hamza. Ai ka theksuar se çështja e ndryshimeve ligjore për Dhomat e Specializuara i takon një spektri më të gjerë dhe nuk mund të mbetet peng i interesave partiake apo i kushtëzimeve që synojnë arritjen e qëllimeve të caktuara politike. Për më tepër, Hamza ka theksuar se PDK-ja nuk do të nënshtrohet ndaj presioneve të tilla gjatë procesit të përzgjedhjes së shefit të shtetit. Lideri i opozitës ka vënë në pah edhe standardet e dyfishta që, sipas tij, po i përdor ekzekutivi në dialogun politik, duke përmendur se si janë trajtuar palët e tjera në raport me kandidaturat politike për postin e presidentit. “Ne vazhdimisht kemi qenë në takime dhe kemi biseduar. Sa ka seriozitet kjo punë kur ka qëndrime të ndryshme? Në mesditë ka qenë komunikimi i fundit dhe ku e kam informuar se për PDK-në mund të kalojë ligji në leximin e dytë dhe pastaj të flasim për presidentin. Kësaj i thonë marrëveshje, a? Kësaj i thonë një ligj për çështje madhore, po ta votojë ky, është presidenti. Standarde të dyfishta. LDK-së i thonë s’ka mundësi të ketë president politik, ndërsa PDK-së i thonë s’ka mundësi të ketë president politik, ndërsa vetë propozon emra puro politikë. Për më tepër, këta emra janë që s’kanë kaluar se sa kohë dhe s’ka pasur marrëveshje dhe vendi ka shkuar në zgjedhje... Presidenti ka mundur të zgjidhet, por jo president pa marrëveshje. Jo: president, ky është emri, merre ose lëre. Pse s’ka qenë ky lloj bisede para tri apo dhjetë ditësh, dje, por sot paradite? Në orët e mbrëmjes është me gjet një adresë që pse s’po mund t’i kapë të gjitha institucionet”, shtoi ai.