Ardon Jashari zbret në fushë, Zvicra në avantazh kundër Maqedonisë së Veriut

Përfaqësuesja e Zvicrës ka kaluar në epërsi ndaj Maqedonisë së Veriut në një përballje ku dominimi i helvetikëve ka qenë evident që nga minutat e para. Goli i parë erdhi në minutën e 43-të, kur Fabian Rieder shfrytëzoi në mënyrë perfekte një pasiguri në prapavijën kundërshtare, duke dërguar topin në rrjetë me një goditje të qetë nga afërsia për rezultatin 1:0. Me fillimin e pjesës së dytë, stafi teknik i Zvicrës bëri ndryshime në formacion. Në minutën e 46-të, Ardon Jashari u inkuadrua në lojë duke zëvendësuar Vincent Sierron, për t'i dhënë freski mesfushës zvicerane. Në krahun tjetër, Maqedonia e Veriut po luan me një përfaqësim të fortë të futbollistëve shqiptarë. Kapiteni Enis Bardhi, së bashku me Visar Musliun, Ezgjan Alioskin dhe Agon Elezin, e kanë nisur këtë sfidë si titullarë, duke mbajtur peshën kryesore të lojës për ekipin e tyre në përballjen e sotme.