Perspektiva ekonomike e Maqedonisë së Veriut: Banka Botërore parashikon rritje prej 3.2% për vitin 2027

Institucioni financiar ndërkombëtar, Banka Botërore, ka projektuar një zgjerim ekonomik prej 3,2 për qind për Maqedoninë e Veriut gjatë vitit 2027. Kjo shifër përfaqëson një përmirësim prej 0,3 për qind në krahasim me parashikimet e vitit 2026, ku norma e rritjes pritej të ishte 2,9 për qind. Gjatë kësaj periudhe janë regjistruar gjithashtu zhvillime pozitive si rënia e shkallës së varfërisë dhe papunësisë, si pasojë e investimeve të huaja direkte dhe zgjerimit të shkëmbimeve tregtare. Megjithatë, dokumenti i analistëve ndërkombëtarë vë në dukje disa sfida thelbësore për zhvillimin e mëtejshëm ekonomik, ku përfshihen varësia e lartë nga importi i energjisë dhe lëndëve djegëse, rritja e hovshme e borxhit publik, mospërputhja mes rritjes së pagave dhe produktivitetit, plakja demografike dhe emigracioni, si dhe mangësitë në qeverisje e korrupsioni. Gjatë dorëzimit të këtij raporti te kryeministri Hristijan Mickoski, u vlerësua se gjetjet shërbejnë si një bazë e shëndoshë për ndërmarrjen e reformave të ardhshme. "Për këtë shkak ne e ndryshuam ligjin për marrëdhënie pune dhe lejuam që gjithsecili që e ndjenë veten si të aftë për punë, të mundet ta vazhdojë punën deri në moshën 67-68 madje në disa fusha deri në 70 vjet. Kjo është trend gjithandej në Evropë dhe Botë. Për momentin në tregun e punës kemi 709 mijë punëtor të regjistruar. Nuk guxojmë të jemi nën numër nëse duam të kemi rritje të mirë ekonomike, përkatësisht nën 800 mijë të punësuar. Duhet të gjejmë edhe 90 mijë të punësuar të tjerë të cilët do të sjellin të ardhura në shtet. Kam frikë se pas 15-20 viteve numri i të punësuarve do të bie në 500 mijë”, deklaroi kryeministri Hristijan Mickoski. Në krahun tjetër, subjekti opozitar ka shprehur qëndrime të kundërta, duke theksuar se Prodhimi Bruto Vendor mbetet në nivelin e një të tretat e mesatares evropiane dhe se vendi nuk mund të konsiderohet si ekonomia e tretë në kontinent. “Banka Botërore nuk e uroi. I tha se vendi me vite po qëndron në kategorinë e njëjtë. Prodhimi Bruto Vendor në kokë banori është sa një e treta e mesatares në Bashkimin Evropian. Jo ekonomia e tretë por 1/3 e standardit. Vendet e reja të punës janë me produktivitet të ulët dhe me paga të ulëta. Diaspora është mbi gjysmë milioni. Çfarë do të vizatojë tani? Përralla “të tretët në Evropë” dështoi. Rritja më shpejtë dështoi. Pensionet 16 herë më të larta dështoi”, theksuan nga radhët e LSDM-së. Ndërkohë, për vitin 2028, Banka Botërore ka parashikuar një normë rritjeje prej 3% për vendin. Në nivel rajonal, pritshmëritë ekonomike për shtetet e Ballkanit Perëndimor lëvizin nga 3,1 për qind për vitin 2026 deri në 3,4 për qind gjatë dy viteve që pasojnë.