Reagimi i ashpër ndaj Kurtit: Këto përralla e filozofi nuk i pranojmë, ligji për UÇK-në nuk pret

Çlirim Haziri, përfaqësues i platformës “Jo në emrin tim”, ka reaguar ashpër ndaj ofertës që kryeministri Albin Kurti i bëri kryetarit të PDK-së, Bedri Hamza, lidhur me votimin e Ligjit për Dhomat e Specializuara. Në prononcimin e tij, Haziri ka theksuar se protestuesit nuk i përkasin asnjë subjekti politik, por përfaqësojnë zërin e qytetarëvë që kanë protestuar për tri javë radhazi në mbrojtje të Ushtrisë Çlirimtare të Kosovës. Sipas tij, kërkesa e tyre mbetet e pandryshuar dhe e qartë: miratimi i këtij projektligji. Sipas Hazirit, ky nismëligj synon t'i japë mbështetje drejtësisë së mirëfilltë, duke shmangur vendimmarrjet që mund të ndikohen nga faktorë të jashtëm dhe që nuk mbështeten në prova konkrete. Ai ka shtuar se pret që ky projektligj të kalojë gjatë ditës, ndërsa ka paralajmëruar se protestuesit do të mbeten të pranishëm në shesh deri në epilogun e këtij procesi. Duke iu referuar rrethanave aktuale institucionale, Haziri ka përmendur se koha në dispozicion është tejet e shkurtër para shpërbërjes së Kuvendit, duke hequr kështu funksionin e deputetëve dhe të Qeverisë, ndërsa ka vlerësuar se UÇK-ja ka nevojë urgjente për mbështetjen e institucioneve të vendit. Në fund, ai ka hedhur poshtë arsyetimet e kryeministrit Kurti se zgjedhja e presidentit përbën urgjencën kryesore, duke ia kujtuar atij praninë e qytetarëve para dyerve të institucioneve për 21 ditë. Haziri ka përfunduar se krahasimet dhe filozofitë e tilla të kreut të ekzekutivit nuk do të tolerohen më tutje.