Debati për Presidentin: Hekuran Murati i fton gazetarët të presin qëndrimin e Bedri Hamzës

Ministri i Financave, Hekuran Murati, ka reaguar ndaj zhvillimeve të fundit politike që lidhen me procesin e zgjedhjes së presidentit të ardhshëm të vendit dhe propozimin e fundit të kryeministrit Albin Kurti drejtuar Partisë Demokratike të Kosovës. Sipas Muratit, pjesë e mediave kanë nxituar në raportimet e tyre për të konfirmuar tërheqjen e profesor Bekim Sejdiut nga gara për kreun e shtetit, pa u sqaruar më parë pozicioni dhe përgjigja zyrtare e kryetarit të PDK-së, Bedri Hamza, lidhur me ofertën e re të ekzekutivit. Në një reagim publik, ai ka bërë të publike detajet e propozimit të paraqitur për opozitën. Ai ka theksuar se nëse vetëm gjysma e deputetëve të grupit parlamentar të PDK-së votojnë kundër Bekim Sejdiut si kandidat për president, Lëvizja Vetëvendosje zotohet të sigurojë votat e saj për miratimin në lexim të dytë të Projektligjit për ndryshimin dhe plotësimin e Ligjit për Dhomat e Specializuara. “Disa medie u nxituan që ta rikonfirmojnë tërheqjen e Prof. Bekim Sejdiut për President të Republikës në vend se ta marrin përgjigjen nga kryetari i PDK-së, Bedri Hamza, për ofertën e re të Kryeministrit Kurti”, ka shkruar Murati në postimin e tij. Në vijim të reagimit, anëtari i kabinetit qeveritar u është drejtuar përfaqësuesve të mediave me kërkesën që sqarimet rreth kësaj çështjeje t'i kërkojnë drejtpërdrejt nga kreu i partisë opozitare. “Të dashur gazetarë, pyeteni së pari Hamzën. Le të thotë Bedri Hamza PO”, ka përfunduar shkrimin e tij ministri Murati.