Prapaskenat e “Topit të Artë”: Tensionet mes Mbappe dhe Real Madridit

Kylian Mbappe është sërish në qendër të vëmendjes dhe të polemikave në Spanjë, kësaj radhe për shkak të raporteve të tij me klubin e Real Madridit dhe garës për çmimin prestigjioz individual, “Topin e Artë”. Sipas gazetarit të njohur të “Radio Marca”, Javier Tinto, ylli francez i ka kërkuar drejtuesve madrilenë që të përfshien publikisht në një fushatë mbështetëse për kandidaturën e tij. “Ajo që më kanë thënë është se, gjatë javës së derbit, Mbappe i kërkoi Real Madridit të përfshihej dhe të bënte fushatë për të në garën për ‘Topin e Artë’”, është shprehur Tinto. Megjithatë, udhëheqësit e klubit mbretëror thuhet se kanë refuzuar këtë kërkesë. Gazetari shtoi se ky mund të jetë një shpjegim për paraqitjen e zbehtë të skuadrës në derbin ndaj Atletico Madridit, duke e lidhur situatën edhe me pakënaqësitë e sulmuesit. Zbulimet e Tintos nuk u ndalën me kaq, pasi ai pretendoi se Mbappe kishte kërkuar ndihmë edhe nga legjenda Zinedine Zidane, kërkesë e cila gjithashtu nuk u realizua për shkak të lidhjeve të Zidane me kandidatë të tjerë si Ousmane Dembele. Nga ana e tij, lojtari nuk ka ngurruar të reagojë ndaj këtyre aludimeve, duke zgjedhur ironinë në rrjetet sociale për të hedhur poshtë raportimet rreth tij. “Po, mirë, po, dhe unë u grinda edhe me tezen time të madhe”, ka shkruar Mbappe në një koment në Instagram, duke hedhur poshtë pretendimet e ngritura. Ky reagim ka ndezur menjëherë rrjetet sociale, ndërkohë që mbetet për t'u parë nëse do të ketë ndonjë deklaratë zyrtare nga klubi i Real Madridit për të qartësuar këtë situatë.