Pazar politik për presidentin dhe Specialen: Kurti i bën ofertë publike PDK-së

Kryeministri Albin Kurti ka dalë me një propozim publik drejtuar Partisë Demokratike të Kosovës, duke kushtëzuar miratimin e ndryshimeve ligjore për Gjykatën Speciale me mbështetjen për zgjedhjen e presidentit të ri. Gjatë një konference për media, kreu i ekzekutivit deklaroi se nëse PDK-ja garanton të paktën gjysmën e votave të 22 deputetëve të saj për zgjedhjen e Bekim Sejdiut në krye të shtetit, atëherë ai do të sigurojë 62 vota nga radhët e partisë së tij dhe partnerëve të koalicionit për të kaluar ndryshimet në ligjin për Gjykatën Speciale në Hagë. Bekim Sejdiu është emri i propozuar përmes një marrëveshjeje mes Lëvizjes Vetëvendosje dhe Lidhjes Demokratike të Kosovës. Kurti theksoi se Sejdiu mbetet kandidati zyrtar dhe se mbështetja e një pjese të deputetëve të PDK-së është vendimtare për të arritur kuorumin e nevojshëm prej të paktën 80 deputetësh në Kuvendin me 120 vende, pikërisht në ditën e fundit të afatit kushtetues. Duke theksuar se tashmë është në pritje të një përgjigjeje, Kurti vuri njet në pah se opozita aktualisht po refuzon çdo mundësi takimi dhe komunikimi me pushtetin. Në anën tjetër, kryetari i PDK-së, Bedri Hamza, kishte deklaruar paraprakisht se nuk do të zhvillojë takime me kryeministrin Kurti apo ndonjë palë tjetër, për aq kohë sa nuk miratohen ndryshimet ligjore që synojnë kufizimin e kompetencave të Gjykatës Speciale.