Dugolli pas deklaratës së Hamzës: Synimi i opozitës ishte çuarja e vendit drejt zgjedhjeve të parakohshme

Deputeti i Lëvizjes Vetëvendosje, Enver Dugolli, ka reaguar ndaj deklaratës së fundit të kryetarit të Partisë Demokratike të Kosovës, Bedri Hamza, lidhur me shkuarjen e vendit në zgjedhje. Përmes një postimi në rrjetet sociale, Dugolli vlerësoi se kjo deklaratë dëshmon se synimi kryesor i opozitës ka qenë që në nisje orientimi drejt zgjedhjeve të jashtëzakonshme. “E thënë troç dhe pa lajka nga kryetari i PDK-së z. Hamza: ‘Në zgjedhje po shkojmë’,” citohet të ketë shkruar ai. Sipas tij, çështja nuk ka të bëjë as me zhvillimet në Hagë, as me ligjin apo vendimet e atjeshme, dhe aq më pak me institucionin e presidentit. Ai theksoi se qëllimi i vetëm mbetet rikthimi i vendit në zgjedhje të reja, me shpresën e mposhtjes së kryeministrit Albin Kurti dhe Lëvizjes Vetëvendosje. Në përmbyllje të reagimit të tij, deputeti i mazhorancës u bëri thirrje qytetarëve që të reflektojnë mbi këtë situatë, duke besuar se tashmë kjo prapaskenë është bërë e dukshme për të gjithë.