Vonesë globale e vaksinave të gripit, Ministria e Shëndetësisë jep detajet për mbërritjen e tyre këtë muaj

Ministria e Shëndetësisë është duke ndërmarrë të gjitha hapat e nevojshëm për të garantuar sa më parë furnizimin me vaksina kundër gripit sezonal, në mënyrë që imunizimi i grupeve më të rrezikuara të qytetarëve të nisë sipas agjendës së parashikuar. Sipas dikasterit shëndetësor, kjo vonesë vjen si pasojë e një ngërçi me përmasa globale që ka prekur prodhimin e serumeve për shkak të mutacioneve në strukturën e viruseve. Megjithatë, institucioni përgjegjës shpreson se do t'i sigurojë dozat e nevojshme përmes mekanizmave ndërkombëtarë gjatë harkut kohor të këtij muaji. "Thirrja e hapur e prokurimit mbeti pa oferta për shkak të sfidave prodhuese në shkallë globale, dhe jo për shkak të defekteve në procedurat tona. Për herë të parë gjatë këtij viti, të tria llojet e viruseve të përfshira në vaksina kanë pësuar ndryshime të menjëhershme, ku dy prej tyre i përkasin gripit A dhe një tjetër gripit B. Përditsimi i njëkohësuar i tyre nga Organizata Botërore e Shëndetësisë dhe agjencia amerikane FDA solli shtyrjen e ciklit prodhues në nivel botëror", bëjnë të ditur nga Ministria e Shëndetësisë. Përballë kësaj situate, autoritetet theksojnë se po bashkëpunojnë ngushtë me shtetet e rajonit dhe partnerët ndërkombëtarë, me synim që vaksinat të mbërrijnë në vendin tonë brenda muajit. "Imunizimi mbetet mburoja kryesore dhe më efikase ndaj komplikimeve dhe formave klinike të rënda të gripit, sidomos për personat me sëmundje kronike, popullatën e moshuar dhe gratë shtatzëna. Opinionin publik do ta njoftojmë me kohë për çdo zhvillim të ri", përfundon deklarata e Ministrisë së Shëndetësisë.